संतापजनक! कॉलेजमध्ये लेक्चरर झाला हैवान; होमवर्क न केल्याने विद्यार्थ्यांना अमानुष मारहाण

एका पॉलिटेक्निक कॉलेजमध्ये लेक्चररने विद्यार्थ्यांना अमानुषपणे मारहाण केल्याचा धक्कादायक प्रकार उघडकीस आला आहे.

तेलंगणातील मेडक जिल्हयातील एका कॉलेजमधून अत्यंत संतापजनक घटना समोर आली आहे. जिल्ह्यातील रत्नपुरी गावातील तुर्कल खानापूर भागात असलेल्या एका पॉलिटेक्निक कॉलेजमध्ये लेक्चररने विद्यार्थ्यांना अमानुषपणे मारहाण केल्याचा धक्कादायक प्रकार उघडकीस आला आहे. या घटनेत अनेक विद्यार्थी गंभीर जखमी झाले असून त्यांना उपचारासाठी रुग्णालयात दाखल करावं लागलं आहे.

मिळालेल्या माहितीनुसार, रत्नपुरी पॉलिटेक्निक कॉलेजमधील लेक्चरर शिवा रेड्डी यांनी होमवर्क पूर्ण न केल्यामुळे विद्यार्थ्यांवर हल्ला केला. लेक्चररने रागाच्या भरात विद्यार्थ्यांना काठीने आणि हाताने बेदम मारहाण केल्याचा आरोप आहे. एवढंच नाही तर विद्यार्थ्यांना मारहाण करताना ते सतत शिवीगाळ देखील करत होते. जेव्हा काही विद्यार्थ्यांना होमवर्कबद्दल विचारण्यात आले तेव्हा ही घटना घडली. 

विद्यार्थ्यांनी होमवर्क पूर्ण झाला नसल्याचं सांगताच लेक्चरर शिवा रेड्डी अचानक संतापले आणि त्यांनी वर्गातच विद्यार्थ्यांना मारहाण करण्यास सुरुवात केली. यामध्ये अनेक विद्यार्थ्यांना गंभीर दुखापत झाली. घटनेनंतर जखमी विद्यार्थ्यांना तातडीने जवळच्या रुग्णालयात दाखल करण्यात आलं असून तिथे त्यांच्यावर उपचार सुरू आहेत. या प्रकारामुळे विद्यार्थी आणि पालकांमध्ये तीव्र संताप व्यक्त होत आहे. एका शिक्षकाकडून असे अमानवीय कृत्य घडावं, हे धक्कादायक असल्याचं स्थानिक लोकांचं म्हणणं आहे.

घटनेची माहिती मिळताच तुर्कला खानापूर परिसरातील पोलिसांनी घटनास्थळी धाव घेत माहिती गोळा केली. पोलिसांनी आरोपी लेक्चरर शिवा रेड्डी विरुद्ध गुन्हा दाखल केला आहे. विद्यार्थी आणि त्यांच्या पालकांच्या तक्रारीवरून हा गुन्हा नोंदवण्यात आला असून प्रकरणाचा सखोल तपास सुरू असल्याचे पोलीस अधिकाऱ्यांनी सांगितले. तपास पूर्ण झाल्यानंतर योग्य ती कायदेशीर कारवाई केली जाईल, असंही पोलिसांनी स्पष्ट केलं आहे. सध्या पोलीस आरोपी लेक्चररची चौकशी करत असून कॉलेज प्रशासनाकडूनही या प्रकरणावर स्पष्टीकरण मागवण्यात आले आहे.