शाळा ट्रस्टीच्या मुलाने शिक्षिकेला पाठवला अश्लील मेसेज; डोंबिवलीच्या शाळेतील धक्कादायक प्रकार

डोंबिवलीत एका शाळेत अतिशय धक्कादायक प्रकार समाेर आला आहे.

डोंबिवली : डोंबिवलीत एका शाळेत अतिशय धक्कादायक प्रकार समाेर आला आहे. शाळेतील ट्रस्टीचा मुलगा एका शिक्षिकेला अश्लील मेसेज पाठवून शारिरिक संबंध ठेवण्यासाठी दबाव टाकत होता. या प्रकरणात मनसेने शाळेत जाऊन प्रचंड गोंधळ घातला. त्या नराधमाला आमच्या ताब्यात द्या अशी जोरदार मागणी केली.

अखेर मानपाडा पोलीस शाळेत दाखल झाले. पोलिसांनी ट्रस्टचा मुलगा सरवना अय्यर याला ताब्यात घेतले आहे. या व्यक्तीने सहावीच्या मुलीसोबत असा प्रकार केला असल्याचे पीडित शिक्षिकेने सांगितले आहे. या प्रकरणाचा तपास पोलीस करीत आहे. शाळेच्या ट्रस्टीने स्पष्ट सांगितले आहे की, माझ्या मुलाने असा प्रकार केला असल्यास त्याला शिक्षा झाली पाहिजे.

डाेंबिवली सागांव परिसरात जय भारत हायस्कूल ही शाळा आहे. या शाळेचे ट्रस्ट शिवा अय्यर आहेत. शिवा आय्यर यांचा मुलगा सरवना याच्यावर शाळेतील शिक्षिकेने गंभीर आरोप केला आहे. शिक्षिकेच्या मुलीला सरवना अय्यर याने अश्लील मेसेज पाठविला. अश्लील व्हिडीओ पाठवून तिने त्याच्यासोबत शरीर संबंध ठेवावे अशी मागणी करीत होता असा आरोप शिक्षिकेने केला आहे. या प्रकरणी शिक्षिकेसह तिच्या आईने मनसेकडे तक्रार केली.

हा प्रकार कळताच मनसेचे पदाधिकारी राहूल कामत, अरुण जांभळे, मनसेच्या महिला पदाधिकारी कोमल पाटील यांनी थेट शाळेत धाव घेतली. शाळेत शाळेचे ट्रस्टी शिवा अय्यर आणि त्यांच्या पत्नी उपस्थित होत्या. यावेळी मनसेने मुलाला कुठे लवपून ठेवला आहे. त्याला आमच्या दाब्यात द्या अन्यथा मनसे स्टाईलने त्याला शिक्षा देऊ अशी जोरदार मागणी केली. जवळपास एक तास शाळेत मनसे पदाधिकाऱ्यांनी गोंधळ घातला. अखेरी हा प्रकार कळताच मानपाडा पोलिसांनी घटनास्थळी धाव घेतली.

वरिष्ठ पोलीस निरिक्षक संदीपान शिंदे यांनी स्वत: मनसे पदाधिकाऱ्यांना  शाळेतून बाहेर काढत ट्रस्टी शिवा यांच्याकडे त्यांच्या मुलाविषयी विचारणा केली. त्यावेळी शिवा यांनी पोलिसांना शाळेच्या शेजारी असलेल्या त्यांच्या घरी नेले. पोलिसांनी शिवा यांच्या घरातून त्यांचा मुलगा सरवना याला ताब्यात घेतले. त्याला पोलीस ठाण्यात नेले आहे. पोलीस ठाण्यात शिक्षिका, तिची आई, मनसे पदाधिकारी पोहचले आहेत. पोलिसांकडून या प्रकरणी पुढील कारवाई सुरु आहे. शाळेचे ट्रस्टी शिवा अय्यर यांनी सांगितलं की, माझ्या मुलावर जो गंभीर आरोप करण्यात आला आहे. या प्रकरणी तो दोषी असल्यास त्याला शिक्षा द्यावी.