पालांदूर (भंडारा): भरधाव ट्रॅक्टरने धडक दिल्याने मोटरसायकलस्वार ठार तर दोन जण गंभीर जखमी झाले. ही घटना लाखनी तालुक्याच्या मुरमाडी तुपकर येथे शनिवारी रात्री ७.४५ वाजता घडली. ट्रॅक्टर चालकाला अटक होत नाही तोपर्यत मृतदेह उचलणार नाही अशी भूमिका गावकऱ्यांनी घेतल्या तणाव निर्माण झाला आहे. पोलीस घटनास्थळी दाखल झाले आहे.
मन्साराम श्रीराम काळे (३२) रा. मेंढा (भुगाव) असे मृताचे नाव आहे. राजू हेमराज काळे (२५), दीपक दुधराम बारसे (३८) अशी जखमींची नावे आहेत. लाखनी तालुक्यातील मुरमाडी तुपकर येथील जिल्हा परिषद शाळेच्या समोरील विठ्ठल-रखुमाई मंदिराजवळ ट्रॅक्टरने मोटरसायकलला घडक दिली. त्या मोटरसाकलवरील तिघेही खाली कोसळले. मन्साराम यांचा जागीच मृत्यू झाला. अपघाताची माहिती होताच गावकऱ्यांनी अपघातस्थळी धाव घेतली. ट्रॅक्टर चालकाला ताब्यात घेत नाही तोपर्यत मृतदेह उचलणार नाही अशी भूमिका घेतली. पोलिसांना या घटनेची माहिती देण्यात आली. पीएसआय तेजस सावंत, माधव वनवे घटनास्थळी दाखल झाले. गावकऱ्यांची समजुत काढण्याचा प्रयत्न सुरु होता. मात्र रात्री १०.३० पर्यंत कोणताच तोडगा निघाला नव्हता.