खळबळजनक! नात्यातील महिलांशी जवळकीच्या संबंधाचा आला संशय; मित्रांनीच केली निर्घृण हत्या

हात, पाय, शिर धडावेगळे करत मृतदेह भीमा नदीत फेकला; इंदापूर तालुक्यातील धक्कादायक घटना,

इंदापूर  (बाभुळगाव) : एका २३ वर्षीय युवकाची जिवलग मित्राच्या नात्यातील महिलांशी जवळकीचा संबंध असल्याच्या संशयावरून धारदार शस्त्राने हात, पाय, शिर धडापासुन वेगळे करत निर्घृण हत्या करण्यात आली आहे. ही खळबळजनक घटना गणेशवाडी (ता.इंदापूर) येथील नदीपात्राजवळ घडली आहे. 

संजय महादेव गोरवे (वय 23, रा. टाकळी (टेंभुर्णी),ता.माढा, जि. सोलापूर) असे निर्घृण हत्या झालेल्या युवकाचे नाव आहे. याबाबत फिर्याद मृत युवकाची आई मंजुषा महादेव गोरवे(वय ५१, रा. टाकळी,ता.माढा,जि.सोलापूर) यांनी इंदापूर पोलीस ठाण्यात दिली आहे.

याप्रकरणी बावडा येथील दादा कांबळे, लकी विजय भोसले, विकी उर्फ व्यकटेश भोसले व महेश उर्फ शैलेश प्रभाकर सोनवणे यांच्याविरुद्ध गुन्हा दाखल करण्यात आला आहे.

दाखल केलेल्या फिर्यादीनुसार, मृत संजय व लकी,विकी व महेश हे एकमेकांचे चांगले मित्र असल्याने संजयवरील मित्रांचे घरी जाणे येणे होते. यातुनच संजयचे लकी, विकी व महेश यांच्या नातेवाईक असलेल्या मनिषा, बायडाबाई व निकिता (नावे बदलुन ठेवली आहेत) यांच्याशी ओळख होऊन त्याचे जवळकीमध्ये रूपांतर झाले होते. जवळकीचा फायदा घेत वरील तिन्ही महिला संजय याला छोट्या-मोठ्या कामासाठी घरी बोलवत असत व त्याच्या गाडीवर बसुन फिरत त्यांची कामे करून घेत होत्या. यावरून संजय व त्यांच्यात जवळकीचे संबंध असल्याचा संशय त्याचे मित्र लकी, विकी व महेश यांना आला. त्यातून त्यांनी संगनमताने संजयचा कायमचा काटा काढण्याचे  ठरविले.

त्याच उद्देशाने आरोपी मित्रांनी संजयला बावडा येथील त्यांचे काका दादा कांबळे यांच्या घरी जेवणाचा कार्यक्रम असल्याचे खोटे निमंत्रण देत रविवारी संध्याकाळी बावडा येथे बोलावुन घेतले होते.निमंत्रण दिले. व रात्रीच्यावेळी भीमानदीच्या गारअकोले पुलाजवळील नदीपात्राजवळ नेत धारदार हत्याराने संजय याचे दोन्ही हात, दोन्ही पाय व डोके धडावेगळे करत त्याचा निर्घृण खून केला. तसेच पुरावा नष्ट करण्याच्या उद्देशाने तोडलेले शरीराचे अवयव इतरत्र फेकून देत नंतर मृतदेहाची ओळख पटू नये यासाठी त्याची भीमानदीच्या पात्रात विल्हेवाट लावली.

संजय बावडा येथे मित्राच्या घरी जेवायला गेला तो परत न आल्याने फिर्यादी यांनी दुसर्‍या दिवशीपासुन शोधाशोध सुरू करून संजय बेपत्ता असल्याबाबतची तक्रार टेंभुर्णी पोलीस ठाण्यात मंगळवारी (दि.१९) रोजी दाखल केली होती.

बेपत्ता संजयचा सर्वत्र शोध सुरू असताना गावातील एकाचा फिर्यादी यांच्या पुतण्याला फोन आला व गारअकोले पुलाजवळ भीमा नदीपात्रात एक प्रेत तरंगत असल्याचे सांगितले. या ठिकाणी फिर्यादी यांचे पतीसह नातेवाईक व ग्रामस्थ यांनी प्रत्यक्ष जात पाहणी केली असता पाण्यात हात,पाय व डोके नसलेले प्रेत आढळुन आले. तिथे आढळलेले चप्पल, मृतदेहाच्या अंगावरील काळ्या रंगाची बरमुडा पॅन्ट व जन्मत: असलेल्या खुनावरून तो फिर्यादी यांचा मुलगा संजय याचे असल्याचे निष्पन्न झाले. 

त्यानंतर इंदापूर पोलिसांनी अवघ्या दोनच तासात या गुन्ह्याचा छडा लावत दोन आरोपींना अटक केली आहे. पुढील तपास इंदापूर पोलीस निरीक्षक नारायण सारंगकर हे करत आहेत.
——