दिल्लीमध्ये एका न्यायाधीशाने घराच्या बाथरूममध्ये गळफास घेतल्याची धक्कादायक घटना समोर आली आहे. अमन कुमार शर्मा असं या न्यायाधीशाचं नाव आहे. अमन हा मूळचा राजस्थानमधील अलवरचा रहिवासी होता आणि दिल्लीच्या DLSA मध्ये सचिव म्हणून कार्यरत होता. दिल्लीतील ग्रीन पार्क येथील निवासस्थानी आपल्या पत्नीसोबत राहत होता. आता या आत्महत्या प्रकरणात धक्कादायक माहिती समोर आली आहे. अमन याचा त्याच्या पत्नीशी वाद सुरू होता असं त्याच्या नातेवाईकांनी सांगितलं आहे.
न्यायाधीश अमन कुमार शर्माच्या एका नातेवाईकाने सांगितलं की, अमनन रात्री १० च्या सुमारास वडिलांना फोन करून म्हटलं होतं की, "पप्पा, मी खूप त्रस्त आहे, आता जगणं अवघड झालं आहे." मुलाच्या या फोननंतर वडील तातडीने अलवरवरून दिल्लीला पोहोचले. तिथे त्यांनी पाहिलं की मुलगा आणि सून यांच्यात कडाक्याचे भांडण सुरू होतं. याच दरम्यान सून म्हणाली, "इथून निघून जा, नाहीतर मी पोलीस बोलावेन." सकाळी पुन्हा दोघांमध्ये भांडण झालं, त्यानंतर अमनने स्वतःला बाथरूममध्ये कोंडून घेतलं. काही वेळाने गळफास घेतला.
पोलिसांनी दिलेल्या माहितीनुसार, अमन शर्मा ग्रीन पार्क मेन येथील यु-४ए च्या पहिल्या मजल्यावर राहत होता. शनिवारी दुपारी १:४५ च्या सुमारास पोलीस नियंत्रण कक्षाला माहिती मिळाली, त्यानंतर पोलीस घटनास्थळी पोहोचले. ही माहिती शिवम यांनी दिली, जे डिफेन्स कॉलनीचे रहिवासी आहेत. पोलीस अधिकाऱ्याने सांगितलं की, मृताची पत्नी देखील न्यायिक अधिकारी असून तिचा जबाब नोंदवला जात आहे. अमन शर्माचा मोबाईल आणि कॉल डिटेल्सची तपासणी केली जात आहे.
पोलीस आता शेजारी आणि सहकाऱ्यांचे जबाब नोंदवत आहेत, जेणेकरून त्यांना हे टोकाचं पाऊल उचलण्यास कोणत्या गोष्टीने भाग पाडलं हे स्पष्ट होऊ शकेल. अमन शर्माने २०१८ मध्ये पुण्याच्या एका विद्यापीठातून कायद्याचं शिक्षण पूर्ण केलं होतं आणि २०२१ मध्ये तो न्यायिक सेवेत रुजू झाला होता. ऑक्टोबर २०२५ मध्ये कडकडडूमा कोर्टातील डीएलएसएचा सचिव म्हणून पदभार स्वीकारला होता. तरुण मुलाच्या निधनाने त्याचे वडील पूर्णपणे खचले आहेत. न्यायाधीशाच्या पत्नीची बहीण आयएएस अधिकारी असून सध्या जम्मूमध्ये तैनात आहे.
Web Summary : A Delhi judge, Aman Kumar Sharma, died by suicide after telling his father life was hard. He had argued with his wife, also a judicial officer. Police are investigating the circumstances.
Web Summary : दिल्ली के न्यायाधीश अमन कुमार शर्मा ने आत्महत्या की। उन्होंने पिता को बताया था कि जीवन कठिन है। पत्नी, जो न्यायिक अधिकारी भी हैं, से उनका विवाद हुआ था। पुलिस मामले की जांच कर रही है।