Delhi Blast : १८ लाख कॅश, खोली क्रमांक २२ अन्... दहशतवादी शाहीनच्या कपाटातून उलगडलं मोठं रहस्य

Delhi Blast : दिल्ली स्फोटांच्या तपासादरम्यान राष्ट्रीय तपास संस्थेने (एनआयए) दहशतवादी डॉ. शाहीनच्या कपाटातून १८ लाख रुपये रोख जप्त केले.

दिल्ली स्फोटांच्या तपासादरम्यान राष्ट्रीय तपास संस्थेने (एनआयए) दहशतवादी डॉ. शाहीनच्या कपाटातून १८ लाख रुपये रोख जप्त केले. ही रोख रक्कम शाहीनच्या खोली क्रमांक २२ च्या कपाटात ठेवण्यात आली होती आणि एका साध्या पॉलिथिन बॅगमध्ये हे पैसे लपवण्यात आले होते.

तपासात असं दिसून आलं की, या वर्षी २५ सप्टेंबर रोजी शाहीनने ब्रेझा कार खरेदी करण्यासाठी या पैशाचा वापर केला. शाहीनने एवढी मोठी रक्कम कशी मिळवली याचा तपास एनआयए सध्या करत आहे. याव्यतिरिक्त एनआयएने अल फलाहच्या एडमिन ब्लॉकमध्ये शाहीनच्या लॉकरचीही झडती घेतली. एजन्सीचा तपास सुरू आहे आणि सर्व पुरावे गोळा करण्यासाठी सखोल चौकशी सुरू आहे.

दहशतवादी डॉक्टर शाहीनने तपास यंत्रणांना दिलेल्या माहितीनुसार, ती डॉ. मुझम्मिलच्या सांगण्यावरून दहशतवादी मॉड्यूलमध्ये सामील झाली आणि त्याच्या सूचनांचं पालन केलं. शिवाय, एजन्सींना डॉ. अबू उकाशाह नावाच्या हँडलरचं टेलिग्राम अकाउंट देखील सापडलं. या अकाउंटद्वारेच २०२२ मध्ये डॉ. मुझफ्फर, डॉ. उमर आणि डॉ. आदिल तुर्कीला गेले.

डॉ. शाहीनचं कुटुंब लखनौमधील डालीगंज येथील घर क्रमांक १२१ मध्ये राहत होते. तिच्या वडिलांनी सांगितलं की, शाहीन मिळून तीन भावंडं आहेत. मोठा मुलगा शोएब तिच्या वडिलांसोबत राहतो, दुसरी शाहीन, ज्याला नुकतीच अटक करण्यात आली होती आणि तिसरा परवेझ आहे.

शाहीनने अलाहाबाद येथे वैद्यकीय शिक्षण घेतलं. ती पूर्वी कानपूरमधील जीएसव्हीएम मेडिकल कॉलेजमध्ये काम करत होती. तिची निवड लोकसेवा आयोगाद्वारे झाली होती. २००९ ते २०१० दरम्यान तिची कन्नौजमधील सरकारी मेडिकल कॉलेजमध्येही बदली झाली. २०१३ मध्ये शाहीन अचानक कानपूरमधील मेडिकल कॉलेजमधून सूचना न देता गायब झाली.