Crime News :'दृश्यम' स्टाईल बनाव फसला! सख्ख्या भावाची चाकू खुपसून हत्या; बुलढाण्यातील धक्कादायक घटना

मिळालेल्या माहितीनुसार, मृतक देविदास महादेव गायकी (वय २८) हा ५ मार्च रोजी दुपारी ३ वाजेच्या सुमारास मित्रासह दारू पिऊन घरी आला होता.

बुलढाणा- खामगाव तालुक्यातील सुटाळा बुद्रुक येथे ५ मार्च रोजी कौटुंबिक वादातून एका तरुणाची त्याच्याच लहान भावाने हत्या केल्याची घटना घडली. दारू पिऊन आलेल्या मोठ्या भावाच्या मित्राला घरी जाण्यास सांगितल्याच्या किरकोळ कारणावरून हा वाद विकोपाला गेला होता.

मिळालेल्या माहितीनुसार, मृतक देविदास महादेव गायकी (वय २८) हा ५ मार्च रोजी दुपारी ३ वाजेच्या सुमारास मित्रासह दारू पिऊन घरी आला होता. लहान भाऊ मंगेश महादेव गायकी (वय २५) याने देविदासच्या मित्राला 'घरी जा' असे म्हटल्याने दोन्ही भावांमध्ये जोरदार भांडण सुरू झाले.

कर्नाटक सरकारचा मोठा निर्णय: 16 वर्षांखालील मुलांना सोशल मीडिया वापरण्यास बंदी

या वादात देविदासने मंगेशच्या डोक्यात हातातील कडे मारले. यामुळे संतप्त झालेल्या मंगेशने घरातील भाजी कापण्याच्या चाकूने देविदासच्या पोटात आणि कुशीत वार केले, या हल्ल्यात देविदासचा मृत्यू झाला.

पोलिसांची दिशाभूल करण्याचा 'दृश्यम' स्टाईल प्रयत्न

घटनेनंतर आरोपी आणि त्याच्या आई वडिलांनी पोलिसांना गुंगारा देण्यासाठी बनाव रचला होता. आईने सुरुवातीला "कोण्या अज्ञात व्यक्तीने वार केले" अशी माहिती देऊन पोलिसांची दिशाभूल करण्याचा प्रयत्न केला.

शिवाजीनगर पोलीस ठाण्याचे सुरेंद्र अहेरकर यांनी रात्री २ वाजता घराची झडती घेतली असता, कुटुंबाकडून 'दृश्यम' चित्रपटाप्रमाणे बनावट घटनाक्रम मांडला जात होता.

पोलिसांना संशय आल्याने त्यांनी वडील आणि लहान भाऊ मंगेश यांना ताब्यात घेतले. पहाटेच्या सुमारास कसून चौकशी केल्यावर मंगेशने आपला गुन्हा कबूल केला.

कायदेशीर कारवाई

शिवाजीनगर पोलिसांनी आरोपी मंगेश गायकी विरुद्ध भारतीय न्याय संहिता कलम १०३(१) आणि ३५२ अन्वये गुन्हा दाखल करून त्याला अटक केली आहे. सध्या सहाय्यक पोलीस निरीक्षक मंदार पुरी या प्रकरणाचा पुढील तपास करत आहेत.