लाचखोर पोलीस अधिकाऱ्यांचे धाबे दणाणले; पोलीस निरीक्षकासह हवालदारावर गुन्हा दाखल

Crime News: तक्रारदार हे काशिमीरा वाहतूक विभागात कार्यरत आहेत. त्यांना प्रकृतीअभावी किंवा अन्य कारणास्तव सोपे काम (लाईट ड्युटी) हवे होते.

मिरा-भाईंदर, वसई-विरार पोलीस आयुक्तालयांतर्गत येणाऱ्या काशिमीरा वाहतूक विभागात भ्रष्टाचाराचा एक धक्कादायक प्रकार समोर आला आहे. आपल्याच विभागातील एका कर्मचाऱ्याला 'लाईट ड्युटी' (हल्के काम) देण्यासाठी चक्क १५,००० रुपयांच्या लाचेची मागणी करणाऱ्या पोलीस निरीक्षकासह एका पोलीस हवालदारावर गुन्हा दाखल करण्यात आला आहे.

या प्रकरणातील तक्रारदार हे काशिमीरा वाहतूक विभागात कार्यरत आहेत. त्यांना प्रकृतीअभावी किंवा अन्य कारणास्तव सोपे काम (लाईट ड्युटी) हवे होते. ही ड्युटी लावून देण्यासाठी काशिमीरा वाहतूक विभागाचे पोलीस निरीक्षक सागर बा. इंगोले यांनी १५,००० रुपयांची मागणी केली होती.

तपासात असे निष्पन्न झाले की, पोलीस निरीक्षक इंगोले यांच्या सांगण्यावरून पोलीस हवालदार मनोज आ. गोल्हार याने तक्रारदाराकडे पैशांचा तगादा लावला होता. हवालदार गोल्हार याने साहेबांसाठी १५,००० रुपये, स्वतःसाठी २,५०० रुपये आणि साहेबांच्या 'रायटर'साठी (शेंडे, सहाय्यक पोलीस उपनिरीक्षक) २,५०० रुपये अशा एकूण लाचेची मागणी केली होती.

एसीबीची सापळा आणि पडताळणीतक्रारदाराला लाच देण्याची इच्छा नसल्याने त्यांनी ५ सप्टेंबर २०२५ रोजी लाचलुचपत प्रतिबंधक विभाग, मुंबई येथे तक्रार नोंदवली होती. एसीबीने ५ सप्टेंबर ते ९ ऑक्टोबर २०२५ या काळात कार्यालयात विविध टप्प्यांवर पडताळणी केली. या पडताळणीत पोलीस निरीक्षक सागर इंगोले आणि हवालदार गोल्हार यांनी लाचेची मागणी केल्याचे स्पष्ट झाले.

गुन्हा दाखल आणि पुढील तपासया प्रकरणाचा अहवाल प्राप्त झाल्यानंतर, ३० मार्च २०२६ रोजी काशिमीरा पोलीस ठाण्यात भ्रष्टाचार प्रतिबंधक अधिनियमाच्या कलम ७ आणि १२ अन्वये गुन्हा (गु.र.क्र. १२७/२०२६) नोंदवण्यात आला आहे. या कारवाईचे मार्गदर्शन अपर पोलीस आयुक्त संदीप दिवाण आणि अपर पोलीस उपआयुक्त अनिल घेरडीकर यांनी केले. या प्रकरणाचा पुढील तपास आता लाचलुचपत प्रतिबंधक विभाग, ठाणे यांच्याकडे वर्ग करण्यात आला आहे.