छत्रपती संभाजीनगरमध्ये ४१.६ अंशांच्या तडाख्याने रस्ते ओस, नागरिकांनो आरोग्य सांभाळा!

वाढत्या उष्णतेमुळे दुपारी रस्ते ओस पडत असून नागरिकांना उकाड्याचा मोठा त्रास सहन करावा लागत आहे.

छत्रपती संभाजीनगर: शहरात गेल्या चार दिवसांपासून तापमानाचा पारा सातत्याने वाढत असून शुक्रवारी (१७ एप्रिल) कमाल तापमानाने ४१.६ अंश सेल्सिअसचा टप्पा ओलांडला आहे. हे यंदाच्या उन्हाळ्यातील सर्वोच्च तापमान ठरले आहे. वाढत्या उष्णतेमुळे दुपारी रस्ते ओस पडत असून नागरिकांना उकाड्याचा मोठा त्रास सहन करावा लागत आहे.

वाढता पारा आणि उष्मा
हवामान विभागाच्या नोंदीनुसार, या आठवड्यात सोमवारपासून तापमानाचा कल वाढता राहिला आहे. १३ एप्रिल रोजी पारा ४१.२ अंशांवर होता, जो शुक्रवारी ४१.६ वर पोहोचला. किमान तापमानही २३.८ अंश सेल्सिअस नोंदवले गेले असून, रात्रीच्या वेळीही उकाडा जाणवत आहे. बुधवारी तापमानात किंचित घट झाली असली तरी उष्म्याची तीव्रता कायम होती.

आठवडाभराचा 'हिट' रिपोर्ट
गेल्या सात दिवसांतील आकडेवारी पाहता, शहर सलग उष्णतेच्या लाटेच्या छायेत असल्याचे दिसते. विशेषतः १३, १४, १६ आणि १७ एप्रिल रोजी तापमान ४१ अंशांच्या वर राहिल्याने यंदाचा उन्हाळा अधिक कडक जाण्याचे संकेत मिळत आहेत.

दिनांक .... कमाल तापमान
१२ एप्रिल ... ४०.४
१३ एप्रिल ... ४१.२
१४ एप्रिल ... ४१.४
१५ एप्रिल ... ४०.८
१६ एप्रिल .... ४१.४
१७ एप्रिल ..... ४१.६