खाजगी वाळू पट्टयांना परवानगी

 बिलोली : चार महिन्याच्या प्रतीक्षेनंतर मांजरा शेजारी असलेल्या खाजगी वाळू पट्टयातील वाळू उपशाकरिता अखेर परवानगी देण्यात आली आहे़ दरम्यान, आलेल्या प्रस्तावांना मान्यता देण्यात येत असल्याने वाळू उपसा सुरू झाला आहे़ इकडे २२ कोटी दंड आकारलेल्या सगरोळी व येसगी या शासकीय वाळू घाटावरील वाळू उपशाला अद्याप मंजुरी देण्यात आली नाही़ दरम्यान, वाळूची मागणी वाढल्याने रात्रीच्या वेळी चोरटी वाहतूक बिनधास्त होत आहे़ बॅक वॉटरच्या माध्यमातून नदीशेजारी शेतामध्ये जमा होणार्‍या वाळूसाठी परवानगी दिली जाते़ महसूल गौण खनिज व पर्यावरण विभागाच्या अहवालानुसार सर्व्हेक्षण करून साठा निश्चित केला जातो़ शासनाच्या दरपत्रकानुसार रॉयल्टी आकारल्यानंतर वाळू उपसा केला जातो़ बिलोलीसह देगलूर तालुक्यात मागच्या सहा-सात वर्षापासून अशी परवानगी दिली जात आहे़ पण या ना त्या कारणामुळे गतवर्षी परवानगी देण्यास उशीर झाला, त्यामुळे वाळू उपसाच झाला नाही़ परिणामी विना-परवाना मोठ्या प्रमाणात वाळू लंपास झाली़ वाळूच्या प्रचंड मागणीमुळे वाळू तस्करांची टोळी तयार झाली़ लगतच्या तेलंगणात चोरटी वाळू लंपास करण्यासाठी चोरट्या मार्गाचा अवलंब झाला़ आता पावसाळा तोंडावर असताना परवानगी सुरू झाली आहे़ गंजगाव, बोळेगाव, येसगी अशा तीन खाजगी पट्टाधारकांना वाळू काढण्यासाठी मंजुरी देण्यात आली आहे़ ठराविक रक्कम भरल्यानंतर संबंधित शेतकर्‍यांना वाळू काढण्याची मूभा देण्यात येते़ (वार्ताहर) तालुक्यातून ३२ प्रस्ताव दाखल यावर्षी गंजगाव, कार्ला, येसगी, सगरोळी, बोळेगाव येथून ३२ प्रस्ताव आले़ पण यावर्षी देखील लहान-सहान कारणे लावून परवानगी लांबवण्यात आली़ अश धोरणामुळे महसूलचा फटका बसला व दुसरीकडे चोरीचा प्रकार वाढला़