पदव्युत्तरला लागली घरघर !

लातूर : शहरातील शासकीय वैद्यकीय महाविद्यालय व सर्वोपचार रुग्णालयातील पदव्युत्तर अभ्यासक्रमाच्या तीन विभागांना सध्या घरघर लागली आहे़ भारतीय आयुर्विज्ञान परिषदेने स्पष्ट केलेल्या त्रुटींच्या पूर्ततेसाठी वैद्यकीय महाविद्यालयाच्या अधिकार्‍यांची धावपळ सुरु असल्याचे पहावयास मिळत आहे़ साधारणत: ३० वर्षांपूर्वी लातुरात जिल्हा रुग्णालय होते़ रुग्णांची संख्या वाढत असल्याने आवश्यक त्या सुविधा उपलब्ध करून देण्याबरोबर वैद्यकीय क्षेत्रातील विद्यार्थ्यांच्या सोयीसाठी लातुरात शासकीय वैद्यकीय महाविद्यालय व सर्वोपचार रुग्णालयास मंजूरी देण्यात आली़ परिणामी जिल्हा रुग्णालयाचे वैद्यकीय महाविद्यालय व सर्वोपचार रुग्णालयात रुपांतर झाले़ त्याचा लाभ रुग्णांना मोठ्या प्रमाणात होण्यास मदत झाली आहे़ वैद्यकीय महाविद्यालय व सर्वोपचारमध्ये उपचार घेण्यासाठी येणार्‍या रुग्णांची संख्या वाढल्याचे पाहून अत्याधुनिक यंत्रसामुग्रीसह खाटांच्या संख्येतही वाढ करण्यात आली़ सध्या हे रुग्णालय ५५० खाटांचे झाले आहे़ शहरातील शासकीय वैद्यकीय महाविद्यालयात विविध विभाग आहेत़ वैद्यकीयचे दर्जेदार शिक्षण मिळण्याबरोबरच प्रात्यक्षिकाचाही अनुभव विद्यार्थ्यांस मिळू लागल्याने गेल्या सहा वर्षांपूर्वी याच ठिकाणी पदव्युत्तर शिक्षण उपलब्ध करून देण्यास शासनाने मान्यता दिली़ त्यानुसार पदवीबरोबरच पदव्युत्तरचे शिक्षणही मिळू लागले आहे़ शिक्षण त्याचबरोबर आवश्यक असलेली यंत्रसामुग्रीची तपासणी भारतीय आयुर्विज्ञान परिषदेकडून केली जाते़ गेल्या वर्षी या परिषदेकडून शासकीय वैद्यकीय महाविद्यालयाच्या पदव्युत्तर विभागातील मेडिसीन, बालरोगतज्ज्ञ आणि अन्य एका विभागाची पाहणी करण्यात आली़ यात एका विभागास अतिदक्षतेतील खाटांची संख्या कमी असल्याचे आढळून आले़ दुसर्‍या विभागात अध्यापनासाठी असलेल्या प्रोफेसरची संख्या कमी आढळली़ तसेच आवश्यक तेवढी सुविधा उपलब्ध नाही़ साहित्य सामुग्रीही अपुरी असणे़, नियमानुसार वॉर्ड नसणे अशा विविध त्रुटी आढळून आल्या़ या त्रुटी शासकीय वैद्यकीय महाविद्यालयास स्पष्ट करून त्या दूर कराव्यात अशा सूचनाही केल्या़ परिषदेने केलेल्या सूचनांचे पालन करण्यासाठी गेल्या काही दिवसांपासून शासकीय वैद्यकीय महाविद्यालयाचे प्रशासन धावपळ करीत आहे़ मात्र, अद्यापही त्यांची पूर्तता झाली नसल्याचे सांगण्यात आले़ विशेष म्हणजे, राज्यातील लातूरपेक्षा मोठ्या असलेल्या शहरांमध्ये शासकीय वैद्यकीय महाविद्यालय असतानाही त्या ठिकाणी पदव्युत्तर अभ्यासक्रम नाही़ लातुरात हा अभ्यासक्रम असून प्रशासनाच्या नियोजनाअभावी त्यास घरघर लागली आहे़ (प्रतिनिधी) लाभ कमी होण्याची भीती... लातुरातील शासकीय वैद्यकीय महाविद्यालय व सर्वोपचार रुग्णालयातील पदव्युत्तर अभ्यासक्रमामुळे वैद्यकीय पदवीधर विद्यार्थ्यांबरोबर रुग्णांनाही त्याचा लाभ मिळत होता़ तीन विभागांना घरघर लागल्याने अत्याधुनिक सुविधा उपलब्ध होण्याची भिती व्यक्त होत आहे़ वैद्यकीयचे पदव्युत्तर शिक्षण घेणार्‍यांवर रुग्ण तपासणीचा मोठा भार असतो़ हे विद्यार्थी कमी झाल्यास रुग्णांची अडचण होण्याची भिती व्यक्त होत आहे़ मेडिकल कौन्सिल आॅफ इंडियाने तपासणी करून पदव्युत्तरच्या काही विभागांत काही त्रुटी स्पष्ट केल्या आहेत़ त्या त्रुटी दूर करण्याचा प्रयत्न सुरु आहे़ त्यामुळे कुठलेही पदव्युत्तर शिक्षण बंद होण्याची भिती नाही, असे शासकीय वैद्यकीय महाविद्यालय व सर्वोपचार रुग्णालयाचे प्रभारी अधिष्ठाता डॉ़ एस़ आऱ गोरे यांनी सांगितले़