मराठवाड्यातील अनुशेषासंदर्भात बैठक

औरंगाबाद : येथील अनुशेषाच्या मुद्द्यावर जास्तीत जास्त निधी मिळवून घेण्यासाठी ९ जानेवारी रोजी सर्वपक्षीय आमदारांच्या बैठकीचे आयोजन करण्यात आले

औरंगाबाद : येत्या मार्च महिन्यात होणाऱ्या अधिवेशनात मराठवाड्यातील समन्यायी पाणीवाटप, येथील अनुशेषाच्या मुद्द्यावर जास्तीत जास्त निधी मिळवून घेण्यासाठी ९ जानेवारी रोजी सर्वपक्षीय आमदारांच्या बैठकीचे आयोजन करण्यात आलेआहे. मराठवाडा महसूल प्रबोधिनी येथे सकाळी १० वाजता बैठकीला सुरुवात होणार आहे. यात समन्यायी पाणीवाटप समजून घेणे व येत्या पावसाळ्यापासून मराठवाड्याच्या हक्काचे पाणी समन्यायी वाटपानुसार मिळवून घेणे, रस्ते, शेती, सिंचन, शिक्षण, आरोग्य, मागासवर्गीय व इतर मागासवर्गीयांसाठीच्या योजना, रेल्वे व इतर बाबींच्या अनुशेषावर चर्चा होईल.अंमलबजावणीचे नियोजन, अनुशेषाची रक्कम व चालू वर्षाचा निधी व दोन्हीसह बजेटमध्ये तरतूद करून घेणे, तज्ज्ञांची मते जाणून घेऊन पुढील ५ वर्षांच्या कालावधीत करावयाचे नियोजन, मराठवाड्याच्या सर्व क्षेत्रात असलेला अनुशेष भरून काढण्यासाठी व इतर समस्या मार्गी लावण्यासाठी मुख्यमंत्री व अन्य मंत्र्यांच्या खातेनिहाय बैठकांच्या तारखा घेऊन नियोजन व अंमलबजावणी करून घेणे, यावर बैठकीत चर्चा होणार आहे.मराठवाडा विभागाच्या विकासाचा अनुशेष भरून काढण्यासाठी सर्वपक्षीय आमदारांनी पक्षभेद विसरून बैठकीत सहभागी व्हावे, असे आवाहन आ. प्रशांत बंब यांनी केले आहे.