विवाहितेचा छळ; पतीस शिक्षा

औंढा नागनाथ : विवाहितेचा छळ केल्याप्रकरणी पतीस दंड ठोठावला.

औंढा नागनाथ : माहेराहून पन्नास हजार रूपये आणण्याची मागणी करीत विवाहितेचा शारिरिक व मानसिक छळ केल्याप्रकरणी पतीस दोषी ठरवून कोर्ट उठेपर्यंत शिक्षा तसेच ५ हजार रूपये दंड ठोठावला. औंढा येथील प्रथमवर्ग न्यायालयाने हा निकाल दिला असून या खटल्यातील इतर सात आरोपींची सबळ पुराव्याअभावी निर्दोष मुक्तता केली आहे.
औंढा नागनाथ तालुक्यातील चिंचोली दराडे येथील रमाबाई (वय २८) हिचा विवाह २००२ मध्ये साळणा येथील गंगाधर शंकर खिल्लारे (वय ३२) याच्याशी झाला.
लग्नानंतर नवरा व घरातील इतर सदस्यांनी ६ वर्षे चांगले नांदविले. त्यानंतर नवरा, सासरा, सासू, दीर, चुलत सासरा, चुलत सासू, नणंद यांनी शेतात विहीर खोदण्यासाठी व पाईपलाईन करण्याकरिता माहेराहून ५० हजार रूपये घेऊन ये, म्हणून तिचा मानसिक व शारीरिक छळ केला, या आशयाची फिर्याद रमाबाई गंगाधर खिल्लारे हिने पोलिसांत दिली. त्यावरून आरोपी गंगाधर शंकर खिल्लारे (नवरा), शंकर चांगोजी खिल्लारे (सासरा), सारजाबाई शंकर खिल्लारे (सासू), सुधाकर शंकर खिल्लारे (दीर), कुंडलिक चांगोजी खिल्लारे (चुलत सासरा) जानकाबाई कुंडलिक खिल्लारे (चुलत सासू), अरूणा पांडुरंग ढगे (नणंद), शिलाबाई मिलिंद मोरे (नणंद सर्व रा.साळणा) यांच्याविरूद्ध कलम ४९८ अ, ३४ भादंविनुसार औंढा पोलीस ठाण्यात गुन्हा दाखल करण्यात आला. तत्कालीन पोलीस हेडकॉन्स्टेबल आर. एन. शेख यांनी गुन्ह्याचा तपास करून सर्व आरोपींविरूद्ध न्यायालयात दोषारोपपत्र दाखल केले.
हा खटला औंढा येथील प्रथमवर्ग न्यायालयात चालला. या खटल्यामध्ये सरकारी पक्षातर्फे एकूण ४ साक्षीदार तपासण्यात आले. दोन्ही बाजूंचा युक्तीवाद ऐकल्यानंतर औंढा न्यायालयाचे प्रथमवर्ग न्यायदंडाधिकारी ए. बी. शेंडगे यांनी ६ आॅगस्ट रोजी या खटल्याचा निकाल दिला.
आरोपी गंगाधर शंकर खिल्लारे यास कलम ४९८ अ भादंविनुसार दोषी ग्राह्य धरून कोर्ट उठेपर्यंत शिक्षा व ५ हजार रूपये दंड, दंड न भरल्यास एक महिना साधा कारावास अशी शिक्षा सुनावली. तसेच दंडाच्या रकमेपैकी ४ हजार रूपये नुकसान भरपाई म्हणून रमाबाई खिल्लारे या हिला देण्याचा आदेशही न्यायालयाने दिला आहे.
सदर खटल्यामध्ये सरकार पक्षाच्या वतीने विशेष सहायक सरकारी अभियोक्ता अ‍ॅड.महेश आहेर यांनी काम पाहिले. (वार्ताहर)