मराठा कार्डही मोदी लाटेसमोर निष्प्रभ

ग्रा मीण भागातील शेवटच्या घटकापर्यंत मोदी लाटेचा प्रभाव जाणवल्याने जिंतूरातून शिवसेनेच्या उमेदवाराला लक्षवेधी मते घेता आली़ भांबळे यांचे मुस्लिम, दलित, मराठा ही मतदानाची त्रिसूत्री फोल ठरली़ मोदी लाटेसमोर मराठा कार्ड निष्प्रभ ठरत शिवसेनेच्या बाजूने झुकले़ यामुळेच स्वत:च्या मतदारसंघातही भांबळे यांना मताधिक्य घेता आले नाही़ मतदारसंघात २ लाख १६ हजार ४९८ मतदारांनी मतदानाचा हक्क बजावला़ यापैकी शिवसेनेचे उमेदवार जाधव यांना ९७ हजार ७३२ तर भांबळे यांना ९७ हजार २४८ तर बसपा उमेदवार गुलमीर खान यांना नाममात्र ५ हजार ८०० मते मिळाली़ जिंतूर तालुक्यातील शिवसेनेला ५४ हजार ९४३ तर राष्ट्रवादीला ६२ हजार ६०३ मते मिळाली़ मतदार संघात भांबळे ४९४ मतांनी पिछाडीवर आहेत़ जिंतूर शहरात जाधव यांना ४ हजार ८७३ मते तर भांबळे यांना ७ हजार ९८४ मते मिळाली़ शहरातून भांबळे यांना केवळ ३ हजार ११६ मतांची नाममात्र आघाडी आहे़ जिंतूर शहरातून मोठे मताधिक्य मिळेल, अशी आशा भांबळे यांना होती़ परंतु, शहरातील विविध मतदान केंद्रावर मोदी लाटेचा प्रभाव दिसला़ जिंतूर तालुक्यातून भांबळे यांना साधारणत: ७ हजार ६६० मतांची आघाडी दिसत असली तरी सेलू तालुक्यातून जवळपास ८ हजार १४४ मतांनी पिछाडीवर आहेत़ मतदानाचा हा ट्रेड पाहता मतदार संघात मोदी लाटेचाच प्रभाव दिसतो़ भांबळे यांनी मागील दोन-तीन वर्षांत केलेली विविध समाजोपयोगी कामे, कार्यकर्त्यांचा संच, विविध संस्थेवर विविध जाती, धर्माच्या पदाधिकार्‍यांना दिलेली संधी पाहता भांबळे यांना पडलेली मते ही अत्यल्प अशीच आहेत, असे असले तरी आ़ बोर्डीकरांनी मतदार संघात शिवसेनेला केलेली मदत भांबळे यांची मते कमी करण्यास काही प्रमाणात यशस्वी ठरली़ विशेष म्हणजे मतदानात दलित, मुस्लिम भांबळे यांच्यासोबत राहिली तरी मतदार संघातील सर्वात मोठा घटक मराठा समाज आहे़ हा समाज आपल्यासोबत राहील हा भांबळे यांचा विश्वास फोल ठरला़ शिवाय इतर विविध समाजाने शिवसेनेपेक्षा मोदींनाच पसंती दिल्याने स्वत:च्या हक्काच्या मतदार संघात भांबळेंना पिछाडीवर रहावे लागले़ काय घडले मतदारसंघात जिंतूर विधानसभा मतदारसंघात काँग्रेसचे आ़ रामप्रसाद बोर्डीकर यांनी शिवसेना उमेदवाराचा प्रचार केल्यामुळे भांबळे यांना जिंतूर मतदार संघातून आघाडी घेता आली नाही़ शिवाय बोर्डीकरांचे संपूर्ण कार्यकर्ते शिवसेनेच्या प्रचारात गुंतल्याने मतदारसंघात शिवसेनेला आयते कार्यकर्ते मिळाले़ मतदार संघामध्ये वंजारी समाजाचे मोठ्या प्रमाणावर मतदार आहेत़ शिवसेना उमेदवार बंडू जाधव यांच्या प्रचारार्थ भाजपाचे राष्ट्रीय उपाध्यक्ष गोपीनाथ मुंडे यांनी जिंतुरात घेतलेली सभा व बंडू जाधव नव्हे गोपीनाथ मुंडे उभा आहे, असे भावनिक केलेले आवाहन यामुळे वंजारी समाजाने शिवसेनेच्या पारड्यात मतदान केले़ याचा भांबळे यांना फटका बसला़ भांबळेंचे मुस्लिम, दलित, मराठा हे समीकरण बिघडले़ मुस्लिम समाज भांबळे यांच्यासोबत राहिला तर काही प्रमाणात दलित समाजानेही भांबळे यांना साथ दिली़ परंतु, मतदार संघातील मोठ्या प्रमाणावर असलेला मराठा समाज आपल्याकडे वळविण्यात भांबळे यश आले नाही़