जोगेश्वरीत अवैध प्लॉटिंग जोरात

वाळूज महानगर : जोगेश्वरी ग्रामपंचायत हद्दीत भूमाफिया कृषिक जमिनीमध्ये रहिवासी व औद्योगिक वापरासाठी प्लॉट पाडून विकत आहेत. या अवैध प्लॉटिंगची ग्रामपंचायतीच्या दप्तरात बेकायदेशीररीत्या नोंदही केली जात आहे. या प्रकरणी त्वरित कारवाई करण्याची मागणी राष्टÑवादी काँग्रेसचे गंगापूर-खुलताबाद विधानसभा अध्यक्ष डॉ. ज्ञानेश्वर पा. नीळ यांनी जिल्हाधिकारी, जि.प. प्रशासन व तहसीलदारांकडे दिलेल्या निवेदनाद्वारे केली आहे. या गटातील भूखंड माफियांशी आर्थिक व्यवहार करून त्यांना खोटे मूळ गावठाण प्रमाणपत्र तुपे यांनी दिले आहे. त्या आधारे भूखंडमाफिया रजिस्ट्री कार्यालयात जाऊन प्लॉट खरेदी करणार्‍यांना रजिस्ट्री करून प्लॉट विकत आहेत, असे पाटील यांचे म्हणणे आहे. काही जण भूखंडमाफियांकडून नोटरीच्या आधारे प्लॉट खरेदी करीत आहेत. या प्लॉटच्या नोंदी ग्रामपंचायतीच्या दप्तरी घेऊन त्यांना नमुना नंबर ८ चा उतारा देण्यात येत आहे. जिल्हाधिकार्‍यांनी नोटरीच्या आधारे प्लॉटच्या नोंदी घेऊ नयेत, असे आदेश ग्रामपंचायतीला दिले आहेत. मात्र या आदेशाचे उल्लंघन करून प्लॉटच्या नोंदी ग्रामपंचायतीकडून घेतल्या जात आहेत. या विषयी ग्रामविकास अधिकारी प्रकाश तुपे यांच्याशी मोबाईलवर संपर्क साधण्याचा प्रयत्न केला असता तो होऊ शकला नाही. उद्योजकांनाही विकतात भूखंड ग्रामपंचायतीच्या कार्यक्षेत्रातील जोगेश्वरी येथील गट नंबर १८१, १८२, १२, ९, ६१ व कमळापुरातील गट नंबर ६ व १५ मध्ये अवैध प्लॉटिंग झाली आहे. हे क्षेत्र सिडको अधिसूचित असताना सिडको प्रशासनाची परवानगी न घेता २० बाय ३० आकाराचे हे प्लॉट विकले जात आहेत. प्रदूषण नियंत्रण मंडळाची परवानगी न घेता उद्योजकांना औद्योगिक वापरासाठी हे भूखंड विकले जात आहेत. या प्लॉटच्या नोंदी नियमबाह्यरीत्या ग्रामपंचायतच्या दप्तरी घेतल्या जात आहेत, असे निवेदनात म्हटले आहे. ग्रामविकास अधिकारी प्रकाश तुपे हे या प्लॉटिंगच्या नोंदी ग्रामपंचायतीच्या मासिक सभेत न घेता परस्पर प्रोसिडिंग बुकला सदस्यांच्या स्वाक्षर्‍या घेऊन ले-आऊटला मंजुरी देऊन करीत आहेत.