प्रवाशांचे प्रचंड हाल

औरंगाबाद : गोरगरीब आणि ग्रामीण भागाची जीवनवाहिनी म्हणून ओळख असलेली एस. टी. बससेवा काही वेळेसाठी बंद झाली तर काय होऊ शकते, याची प्रचीती गुरुवारी हजारो प्रवाशांना आली. राज्य परिवहन महामंडळाच्या कर्मचाऱ्यांनी पुकारलेल्या संपामुळे पहाटेपासूनच बसगाड्या बसस्थानकाबाहेर जाऊ शकल्या नाहीत. दिवसभर प्रवाशांचे प्रचंड हाल झाले. महाराष्ट्र एस. टी. वर्कर्स काँग्रेस संघटनेने कर्मचाऱ्यांना २५ टक्के पगारवाढ मिळावी, यासह विविध मागण्यांसाठी बेमुदत संपाचे हत्यार उपसले. त्यास कर्मचाऱ्यांचा उत्स्फूर्त प्रतिसाद मिळाला. मध्यवर्ती बसस्थानक आणि सिडको बसस्थानकात सकाळपासूनच प्रवाशांची मोठी गर्दी झाली होती. बहुतेक प्रवाशांना संपाची कल्पना नसल्याने त्यांनी चौकशी कक्षावर धाव घेतली. परंतु बससेवा केव्हा सुरू होणार, याची त्यांना कोणतीही माहिती मिळत नव्हती. एखादी तरी बस मिळेल, या आशेने प्रवासी धडपडत होते. नियमित फेऱ्या रद्द झाल्याने शेकडो प्रवासी तासन्तास बसस्थानकात खोळंबले. कर्मचाऱ्यांच्या संपामुळे बाहेरगावी जाणाऱ्या प्रवाशांची मोठी गैरसोय झाली. ही बस जाणार का? कधी जाणार? अशी विचारणा करीत प्रवासी एका ठिकाणाहून दुसऱ्या ठिकाणी गर्दी करीत होते. थांबलेल्या बसमध्ये सामान घेऊन प्रवासी बसत असताना त्यांना अडविले जात होते. त्यामुळे प्रवाशांची तारांबळ उडत होती. यामध्ये वृद्ध आणि बालकांचे सर्वाधिक हाल झाले. बसस्थानकात तासन्तास थांबूनही बस जाणार नसल्याचे लक्षात येताच प्रवासी खाजगी बसगाड्या आणि काळी-पिवळीचा रस्ता धरीत होते. परंतु अशा परिस्थितीत खाजगी वाहतूकदारांनी जादा भाडे घेऊन प्रवाशांची आर्थिक लूट केली. बीडसाठी एस. टी. बसचे भाडे जवळपास १४५ रुपये आहे. परंतु खाजगी वाहतूकदारांनी प्रवाशांकडून तब्बल ४०० ते ५०० रुपये उकळले. अशीच परिस्थिती अन्य ठिकाणांसाठीही होती. एस. टी. कर्मचाऱ्यांच्या संपामुळे नाइलाजाने काही प्रवाशांनी हा भुर्दंड सहन केला. कर्मचाऱ्यांची जोरदार निदर्शने मध्यवर्ती बसस्थानक आणि सिडको बसस्थानकाच्या प्रवेशद्वारासमोर कर्मचाऱ्यांनी जोरदार निदर्शने केली. मध्यवर्ती बसस्थानकात माजी आमदार डॉ. कल्याण काळे, काँग्रेसचे अ‍ॅड. सय्यद अक्रम, प्रवक्ते डॉ. पवन डोंगरे, इब्राहिम पठाण, गुलाब पटेल, राजेंद्र दाते पाटील, कैलास पठारे, शेख अथर, श्रेयस नावंदर, खालेद पठाण, डी. ए. लिपणे पाटील, सुरेश जाधव, जे. एस. ढाकणे, किरण कल्हापुरे, श्याम दाभाडे, गजानन पवार, प्रेमानंद कर्णे आदींची उपस्थिती होती. सिडको बसस्थानकात मच्ंिछद्र बनकर, मिलिंद मुळे, अजय गायकवाड, महेश बोचरे, कपिल गोंधळे, प्रवीण चव्हाण, विजय राठोड, शिवाजी जाधव, अजय गायकवाड आदींची उपस्थिती होती.