जीटीएल अधिकाऱ्यांना दहा लाखांची खंडणी मागितली

औरंगाबाद : जीटीएल कंपनीत दोन ते तीन जणांना नोकरीवर घ्या अथवा दहा लाख रुपये द्या, अशी मागणी करून कंपनीच्या अधिकाऱ्यांना धमकावणाऱ्या दोन तरुणांविरोधात क्रांतीचौक पोलीस ठाण्यात गुन्हा दाखल करण्यात आला आहे. सतीश नरवडे आणि अनिल मगरे (वय १९, पूर्ण नाव आणि पत्ता कळू शकला नाही) असे गुन्हा दाखल झालेल्या आरोपींची नावे आहेत. याविषयी अधिक माहिती देताना क्रांतीचौक पोलिसांनी सांगितले की, निराला बाजार येथे जीटीएल कंपनीचे कार्यालय आहे. या कार्यालयात ३ सप्टेंबर रोजी दुपारी १ वाजेच्या सुमारास कंपनीचे अधिकारी मनोज विनू वेजारे (४९, रा. सिडको एन- १) हे बसलेले होते. त्यावेळी आरोपी तेथे गेले. यावेळी त्यांनी वेजारे यांना भेटून दोन ते तीन जणांना जीटीएल कंपनीत नोकरीला घ्यावे अन्यथा दहा लाख रुपये द्यावे लागतील, अशी धमकी त्यांनी दिली. याबाबत वेजारे यांनी क्रांतीचौक ठाण्यात ११ सप्टेंबर रोजी दिलेल्या तक्रारीवरून या दोन्ही आरोपींविरुद्ध पोलिसांनी गुन्हा दाखल केला आहे. या प्रकरणाचा अधिक तपास पोलीस उपनिरीक्षक सिद्दीकी हे करीत आहेत.