अनधिकृत होर्डिंग काढताना विजेचा तीव्र धक्का; महापालिका कर्मचाऱ्याचा जागीच मृत्यू

Chhatrapati Sambhajinagar: दुसऱ्या एका कर्मचाऱ्याचे हात जळाले.

छत्रपती संभाजीनगर: शहरात लावलेले अनधिकृत बॅनर काढताना महापालिकेच्या कर्मचाऱ्याचा विजेच्या धक्क्याने मृत्यू झाल्याची दुर्दैवी घटना घडली आहे. तर, दुसऱ्या एका कर्मचाऱ्यांचे हात गंभीररित्या जळाले. अमोल दिनकर जाधव (वय २७ रा. मुकुंदवाडी, संजयनगर ) असे मृत कर्मचाऱ्याचे नाव आहे. तर, रवी रणधीर रिडलॉन (वय ३८) हा तरुण गंभीर जखमी झाला. त्याच्यावर सिग्मा हॉस्पिटलमध्ये उपचार सुरू आहेत.

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा!

मिळालेल्या माहितीनुसार, सकाळी नऊच्या सुमारास शहरातील मुकुंदवाडी परिसरात ही धक्कादायक घटना घडली. हनुमान मंदिरावरील अनधिकृत होर्डिंग काढताना, त्याची लोखंडी फ्रेम जवळून जाणाऱ्या ३३ केव्ही वीज तारेच्या संपर्कात आल्याने अमोल दिनकर जाधव यांना विजेचा तीव्र धक्का बसला. त्यांना तातडीने रुग्णालयात दाखल करण्यात आले; मात्र डॉक्टरांनी त्यांना मृत घोषित केले.

कुटुंबीयांचा आक्रोश

या घटनेमुळे जाधव कुटुंबावर दुःखाचा डोंगर कोसळला असून परिसरात शोककळा पसरली आहे. सुरक्षिततेच्या उपाययोजनांबाबत प्रश्न उपस्थित होत असून या प्रकरणाची सखोल चौकशी करून जबाबदारांवर कारवाई करण्याची मागणी होत आहे. घटनेची माहिती मिळताच संबंधित विभागाचे अधिकारी घटनास्थळी दाखल झाले असून पुढील तपास सुरू आहे.