औरंगाबादेत होणार बसपोर्ट

औरंगाबाद : एस. टी. महामंडळाबरोबर प्रवासी वाहतूक सुविधा अधिकाधिक अत्याधुनिक करण्याचा प्रयत्न केला जात आहे. प्रवाशांच्या वाहतुकीच्या दृष्टीने १३ शहरांमध्ये बसपोर्ट उभारण्यात येणार आहे. या १३ शहरांमध्ये मराठवाड्यातील नांदेड आणि औरंगाबाद शहरांचा समावेश आहे, अशी माहिती परिवहनमंत्री दिवाकर रावते यांनी दिली.
परिवहनमंत्री दिवाकर रावते हे सोमवारी शहरात आले असता त्यांच्याशी संवाद साधण्यात आला. त्यावेळी त्यांनी ही माहिती दिली. पर्यटनदृष्ट्या जागतिक पातळीवर नाव असलेल्या औरंगाबाद शहरात अनेक वर्षांपासून अद्ययावत बसस्थानकाची प्रतीक्षा करावी लागत आहे. मध्यवर्ती बसस्थानकाची पार दुरवस्था झालेली आहे; परंतु निधी मंजूर होऊनही अद्ययावत बसस्थानकाचे काम सुरू होत नाही. बसस्थानकाच्या अशा परिस्थितीविषयी रावते म्हणाले की, लवकरच १३ शहरांमध्ये बसपोर्ट बनविण्यात येणार आहे. यामध्ये नांदेड आणि औरंगाबादचा समावेश करण्यात आला असून, त्यास मंजुरीही मिळालेली आहे. लवकरच निविदा प्रक्रिया निघेल.
आंतरराष्ट्रीय निविदा प्रक्रिया
बसपोर्टसाठी आंतरराष्ट्रीय स्तरावर निविदा प्रक्रिया काढण्यात येणार आहे. आगामी वर्षभरात ही निविदा प्रक्रिया काढली जाईल, असे रावते यांनी सांगितले. त्यामुळे लवकरच एअरपोर्टच्या धर्तीवर औरंगाबादेत बसपोर्ट प्रवाशांच्या सेवेत दाखल होणार आहे.
अत्याधुनिक सुविधा
आंतरराष्ट्रीय स्तरावर निविदा प्रक्रिया राबविण्यात येणार आहे. त्यामुळे विविध देशांमधील कंत्राटदार सहभागी होतील. त्यातून बसपोर्टमध्ये प्रवाशांच्या सुविधेसाठी मूलभूतबरोबर अत्याधुनिक सुविधा राहणार आहेत. एटीएम मशीनपासून अन्य सुविधा देण्यात येतील. बसपोर्टमुळे दळणवळणाची सुविधा स्मार्ट होणार आहे.