चंद्रपूर : प्रजासत्ताकदिनी चंद्रपूर-नागपूर मार्गावरील जिल्हा मध्यवर्ती बँकेच्या बाजूला असलेल्या एका चहा टपरीजवळ दुचाकीने स्टंटबाजी करणाऱ्या एका युवकाने आपल्या दिशेने जाणाऱ्या एका दुचाकीस्वाराला मागावून धडक दिली होती. या प्रकरणात रामनगर पोलिसांनी गुरुवारी रात्री दोघांना बेड्या ठोकल्या आहेत. अब्दुल रफियत शेख (२१) रा. बल्लारपूर व उदयकुमार मधुकर ताटकोंडावार (५९) रा. वेकोलि काॅलनी शास्त्रीनगर दुर्गापूर अशी या स्टंटबाज आरोपींची नावे आहेत. अब्दुल रफियत शेख याने स्टंटबाजी करताना हरदीप जसपाल साहानी (४२) रा. हवेली गार्डन या दुचाकीस्वाराला धडक देऊन गंभीर जखमी केले होते. एका खासगी रुग्णालयात त्यांच्यावर उपचार सुरू असून, प्रकृतीत काही प्रमाणात सुधारणा होत असल्याची माहिती या घटनेने तपास अधिकारी पोलीस उपनिरीक्षक देवीदास बावणकुळे यांनी सांगितले. उदयकुमार ताटकोंडावार हा वेकोलिमध्ये कार्यरत आहे. हा इसम दुचाकीवर स्टंटबाजी करीत येत होता. त्याला पाहून अब्दुल रफियत शेख हाही आपल्या दुचाकीवर स्टंटबाजी करू लागला; मात्र त्याचा तोल जाऊन त्याची दुचाकी आपल्या दिशेने जाणाऱ्या दुसऱ्या दुचाकीवर धडकली. यामध्ये दुचाकीस्वार हरदीप जसपाल साहानी हे गंभीर जखमी झाले; मात्र स्टंटबाज जखमीला रुग्णालयात घेऊन जाण्याचे सोडून घटनास्थळावरून आपल्या दुचाकीने धूम ठोकत पसार झाले. स्टंटबाजांचेच मित्र आपल्या दुचाकीने या संपूर्ण घटनेचे मोबाइलद्वारे चित्रीकरण करीत होते. हे चित्रीकरण व्हायरल झाल्याने या घटनेची भीषणता लक्षात आली. चंद्रपुरात अशाप्रकारे स्टंटबाजी करणाऱ्यांची संख्याही मोठी आहे. त्यांच्याही मुसक्या आवळण्याची मागणी चंद्रपूरकर करू लागले आहेत.
‘तो’ नेहमीच करतो स्टंटबाजी
उदयकुमार ताटकोंडावार हा नेहमी कुठेही जाताना हात सोडून दुचाकी चालवितो. तो धावत्या वाहनावर उभा होतो. झोपतो. पंगतीत बसल्यासारखा सीटवर बसतो. या कसरतीसाठी तो ओळखल्या जातो. तो मूळचा सावलीचा असल्याचे समजते. सावलीतही बाजारपेठेतून वाहन चालविताना अशा कसरती करीत असल्याची माहिती आहे. त्याच्या या कसरतीमुळे एका गृहस्थाचा जीव जाण्याची वेळ आली होती.