चोरट्यांनी चक्क उभा ट्रकच चोरला

येथील नीलेश वर्धेवार यांच्या मालकीचा दहा चाकांचा ट्रक (क्रमांक एमएच-३४एव्ही-९५५९) मागील १५ ते २० दिवसांपासून काम नसल्याने येथील नागपूर मार्गावर उभा ठेवला होता. दररोज सकाळी व संध्याकाळी ट्रकमालक नीलेश वर्धेवार उभ्या ठेवलेला ट्रककडे जात असायचे. घटनेच्या दिवशी पहाटेपासून पूर्ण दिवस पाऊस सुरू असल्याने नीलेश वर्धेवार ट्रककडे जाऊ शकले नाही. दुसऱ्या दिवशी पावसाने उसंत दिल्याने नेहमीप्रमाणे सकाळीच नीलेश वर्धेवार उभ्या ट्रककडे गेले असता जागेवर ट्रक दिसला नाही. त्यांनी आजूबाजूला शोध घेतला; परंतु परिसरात कुठेही ट्रक आढळला नाही. शेवटी नीलेश वर्धेवार यांनी पोलिसांत तक्रार नोंदविली आहे. अज्ञात चोरटयांनी चोरून नेलेल्या ट्रकच्या दर्शनी काचावर वर्धेवार ब्रदर्स आणि गणेश गुडस गॅरेज असे लिहिले आहे. ठाणेदार सतीशसिंह राजपूत यांच्या मार्गदर्शनात पोलीस उपनिरीक्षक पुरुषोत्तम राठोड चोरीस गेलेल्या ट्रकचा शोध घेत आहेत.