रेती तस्करी व अवैध वाहतूक : तहसील कार्यालयाची कारवाई
भोजराज गोवर्धन
मूल : मूल तहसील कार्यालयाचे तहसीलदार डाॅ. रवींद्र होळी यांनी रुजू होताच मूल तालुक्यात अवैध रेती वाहतूक, गिट्टीवर ताडपत्री न झाकणाऱ्यांवर कारवाई करणे सुरू केले. केवळ तीन महिन्यात नऊ लाख रुपयांचा महसूल त्यांच्या या कारवाईतून जमा झाला आहे.
जिल्हा प्रशासनाने रेतीघाटाचे अजूनही लिलाव केलेले नाही, परंतु अवैध रेती वाहतूक तालुक्यात मोठ्या प्रमाणावर केली जाते. यामुळे तालुका प्रशासनाने गस्त घालून अवैध रेती वाहतूकदारांवर कारवाई सत्र सुरू केले आहे. मूल तालुक्यात रेती तस्करी करताना मौजा बोरचांदली, सुशी, चिचाळा आणि राजगड येथून रेती भरलेले टॅक्टर जप्त केले आहेत. मौजा चिखली, मूल, केळझर, चिचाळा, डोणी फाटा, आगडी येथे गिट्टी भरलेल्या हायवामध्ये ताडपत्री न झाकल्याच्या करणावरून दंडात्मक कारवाई करण्यात आली आहे. तर मुरूम वाहतूक करीत असताना ताडपत्री न टाकल्यामुळे विरई येथे एका वाहनावर तहसील कार्यालयाकडून कारवाई करण्यात आली आहे. या संपूर्ण वाहनधारकांकडून नऊ लाख १४ हजार ७५० रुपयांचा दंड वसूल करण्यात आला आहे.
बॉक्स
तहसील कार्यालयात वाहनांची गर्दी
गौण खनिज उत्खनन व वाहतूक प्रकरणी अनेक वाहने जप्त करण्यात आली आहे, परंतु अवैध वाहतूकदारांनी अनेक वाहनाचे दंड भरलेले नाहीत. यामुळे तहसील कार्यालय परिसरात अवैध वाहतूक करणाऱ्या वाहनांची मोठी रांग दिसून येत आहे. केवळ तीन महिन्यात लाखो रुपयांचा महसूल जमा करणारे मूलचे तहसीलदार डाॅ. रवींद होळी यांच्यामुळे मूल तालुक्यातील रेती तस्कर धास्तावले आहेत.