जिल्हा परिषदेत भाजपचे बहुमत आहे. त्यामुळे ही निवडणूक एकतर्फी होईल, असा अंदाज होता. मात्र, सोमवारी निवडणुकीप्रसंगी वेगळेच चित्र बघायला मिळाले. भाजपच्या ३६ सदस्यांपैकी बहुतांश सदस्यांनी बैठकीत रोशनी खान यांच्या नावाला विरोध दर्शविला होता. रोशनी खान यांचे नाव सोडून कोणत्याही सदस्याला सभापतिपदावर बसवावे, असे अनेक सदस्यांनी बोलून दाखविले. मात्र, नेत्यांनी रोशनी खान यांचे नाव सुचविल्यामुळे सदस्यांचा नाइलाज झाला होता. वरिष्ठांच्या आदेशाला झुगारून वैष्णवी बोडलावार यांनीही नामांकन दाखल केले होते. भाजपकडून रोशनी खान आणि बोडलावार तर काँग्रेसकडून स्मिता पारधी, नैना गेडाम यांनी नामांकन भरले होते. दुसरीकडे वनिता आसूटकर यासुद्धा नामांकन दाखल करण्यासाठी बैठकीतून जिल्हा परिषदेकडे निघाल्या. मात्र त्यांचे वाहन काही निष्ठावंत सदस्यांनी रोखून धरल्याने त्यांना तिथेच थांबावे लागले. दाखल केलेले नामांकन परत घेण्यासाठी भाजपच्या काही सदस्यांना वैष्णवी बोडलावार यांची मनधरणी करावी लागली. अखेर बोडलावारांनी व काँग्रेसकडून गेडाम यांनी नामांकन मागे घेतल्याने रोशनी खान विरुद्ध स्मिता पारधी अशी निवडणूक झाली. यामध्ये ३४ विरुद्ध ११ अशा मतांनी खान महिला व बाल कल्याण सभापतिपदी निवडून आल्या.
मतभेदामुळेच नामांकन ?
दीड वर्षापूर्वी भाजपचे पदाधिकारी विराजमान झाले त्यावेळी एकजूट होती. मात्र, हे सदस्य विखुरल्याचे आज दिसून आले. रोशनी खान यांचे नाव समोर करताच नामांकन दाखल करण्यापर्यंत प्रचंड विरोध झाला. याच संधीचा फायदा घेत वैष्णवी बोडलावार यांनी नामांकन दाखल केल्याची चर्चा आहे. भाजपकडून दोन्ही नामांकन कायम राहिले असते तर बोडलावारांना काँग्रेसच्या सदस्यांची मते मिळाली असती, असेही बोलले जात आहे.