२0 हजारांची लाच घेताना वैद्यकीय अधिका-यास अटक

धाड येथील घटना; सुरक्षारक्षकाचाही समावेश.

धाड (जि. बुलडाणा) : स्थानिक ग्रामीण रुग्णालयात वैद्यकीय अधीक्षकाचा प्रभार असलेले डॉ. साबीर खान शब्बीर खान व खाजगी सुरक्षारक्षक म्हणून कार्यरत शे. शारीक शे. फारुख यांना २0 हजारांची लाच घेतल्याप्रकरणी लाचलुचपत प्रतिबंधक विभागाच्या पथकाने अटक केली. ६ मे रोजी ही कारवाई करण्यात आली. बुलडाणा तालुक्यातील धाड येथील ग्रामीण रुग्णालयात प्रयोगशाळा तंत्रज्ञ म्हणून कंत्राटी तत्त्वावर कार्यरत शरद दौलत माळोदे यांनी बुलडाणाच्या लाचलुचपत प्र ितबंधक विभागाला डॉ. साबीर खान यांच्याविरुद्ध लाच मागत असल्याची तक्रार दिली होती. माळोदे यांचा सन एप्रिल २0१४ पासूनचा ४८ हजार रुपये पगार रखडला होता. त्यासाठी डॉ. खान यांनी २४ हजार रुपयांची मागणी केली होती. या प्रकरणी तक्रारीवरून लाचलुचपत प्रतिबंधक विभागाने सापळा रचला. ६ मे रोजी प्रभारी वैद्यकीय अधिकारी डॉ. खान यांनी शरद माळोदे यांच्या पगाराचा धनादेश सुरक्षारक्षक शेख शारीक याच्याकडे देऊन ठरलेली रक्कम घेण्यास त्याला सांगितले. त्यानुसार शे. शारीक याने माळोदे यांच्याकडून धाड येथील औरंगाबाद रोडवरील जिजाऊ कॉम्प्युटराइज्ड पॅथालॉजी लॅब येथे घेतली. आधीच दबा धरून असलेले एसीबीच्या पथकातील कर्मचार्‍यांनी घटनास्थळाहून सुरक्षारक्षक शेख शारीक व रुग्णालयातून डॉ. खान यांना अटक करण्यात आली. याप्रकरणी पोलीस ठाण्याला दिलेल्या तक्रारीवरून पोलिसांनी विविधकलमान्वये गुन्हा दाखल केला.