बाजार समितीच्या कर्मचा-यांचे पगार थकले

उत्पन्न कमी,खर्चच जास्त: नवनिर्वाचीत सभापतींसमोर आव्हान!

बुलडाणा : ५५ लाख रुपयांचे वार्षिक उत्पन्न असलेल्या बुलडाणा कृषी उत्पन्न बाजार समितीचा खर्च ६0 लाखावर आहे, अजूनही १ कोटी ९ लाख रूपये विविध देणी बाकी आहेत. तर मागील ८ महिन्यांपासून कर्मचार्‍यांचे पगार थकले आहेत. अशा परिस्थितीत नव्याने पदभार घेतलेले बाजार समितीचे सभापती जालींधर बुधवत यांना हा सर्व ताळमेळ घडून आणण्यासाठी चांगलीच तारेवरची कसरत करावी लागणार आहे. नुकत्याच झालेल्या कृषी उत्पन्न बाजार समितीच्या सभापतीपदावर शिवसेनेचे जिल्हा प्रमुख जालिंधर बुधवत यांची वर्णी लागली. गेल्या अनेक वर्षापासून अडचणीचा सामना करणार्‍या कृषी उत्पन्न बाजार समितीला रुळावर आणण्यासाठी आता त्यांना आव्हानाचा सामना करावा लागणार आहे. ५५ लाख रूपये वार्षिक उत्पन्न असलेल्या बुलडाणा कृषी उत्पन्न बाजार समितीला आस्थापनेवर ४0 लाख रूपये, प्रशासकीय पातळीवर २0 लाख रूपये, सभा खर्च दीड लाख रुपये असा ६0 लाख रुपये वर्षाला खर्च होतो. त्यामुळे बाजार समितीच्या उत्पन्नातून नफा मिळणे तर दुरच उलट तोटाच अधिक होत आहे. त्यामुळे उपबाजारातून बाजार समितीचा दर्जा मिळूनसुद्धा मागील २0 वर्षात चिखली कृषी उत्पन्न बाजार समितीचे ८ लाख ८६ हजार रुपये बुलडाणा बाजार समिती देऊ शकली नाही. या बाजार समितीवर बारा कर्मचारी आहेत. आर्थिकदृष्ट्या नेहमीच डबघाईत असलेल्या या बाजार समितीच्या कर्मचार्‍यांचे मागील डिसेंबर २0१४ पासून म्हणजे आठ महिन्यांचे पगार नाहीत. त्यामुळे कर्मचार्‍यांची कौटुंबीक परिस्थिती बिकट झाली आहे. त्याचा परिणार बाजार समितीच्या कामकाजावर पडणार आहे. ६८ अडते, २९९ अ वर्ग तर ९ ब वर्ग व्यापारी आणि २७७ हमाल, ६६ मापारी तर ५ रोजंदार असलेल्या बाजार समितीची ही सगळी घडी बसविण्यासाठी, बाजार समितीला विकासाच्या मार्गावर आणण्यासाठी नवनिर्वाचित सभापती जालिंधर बुधवत यांच्या समोर आव्हानाचा डोंगर उभा ठाकला आहे.