रस्ता कामाची पाहणी

अमडापूर : चिखली तालुक्यातील अमडापूर व मेडशिंगा या रस्त्याचे डांबरीकरणाचे काम अत्यंत निकृष्ट दर्जाचे होत असल्याचा आरोप करून या कामाच्या चौकशीसाठी येथील ग्रामस्थांनी उपोषण करून काम बंद पाडले होते. दरम्यान, उपविभागीय अधिकारी अनिल पाटील यांनी ४ मार्च रोजी या कामाची पाहणी केली.

या होणाऱ्या कामाबाबत उपमुख्यमंत्री अजित पवार यांच्याशी काही शेतकऱ्यांनी फोनवरून चर्चा करुन निकृष्ट काम होत असल्याची तक्रार केली होती. या ठेकेदाराचे संबंधित कामाचे बिल देऊ नये, अशी मागणी केली. अमडापूर ते मेडशिंगा रोडचे काम हे मुख्यमंत्री ग्राम सडक योजनेच्या माध्यमातून होत असून हे काम २ कोटी ८४ लाख रुपयांचे आहे. हे काम ठेकेदाराकडून करून घेण्यात येत आहे. मात्र हे काम निकृष्ट दर्जाचे होत असल्याने सर्व शेतकरी व गावकरी यांनी हे काम बंद पाडले. याबाबत बुलडाणा उपविभागीय अधिकारी अनिल पाटील यांनाही माहिती देण्यात आली. ४ मार्च रोजी उपविभागीय अधिकाऱ्यांनी या कामाच्या ठिकाणी येऊन कामाची पाहणी केली. ज्या ठिकाणी निकृष्ट काम झाले त्याठिकाणी पुन्हा चांगले काम करण्याचे आश्वासन त्यांनी दिले.