अध्यक्ष, उपाध्यक्षपदामुळे मलकापूरची सरशी!

कार्यकर्त्यांचा जल्लोष; मलकापूरात शहरातून निघाली मिरवणूक.

मनोज पाटील मलकापूर, दि. २१- मातृतीर्थ बुलडाणा जिल्ह्यात बुलडाणा जिल्हा परिषदेत २१ मार्च रोजी राष्ट्रवादी काँग्रेस पक्षाच्या टेकूने भारतीय जनता पक्षाने नव्या राजकीय इतिहासाचा अध्याय रचला. अनपेक्षित व तेवढय़ाच धक्कादायकरीत्या जिल्हा परिषद अध्यक्षपदी उमा तायडे व उपाध्यक्षपदी मंगला रायपुरे यांना विराजमान करीत दोन्ही महत्त्वाची पदे मलकापूरच्या या जिजाऊंच्या लेकींच्या हाती देत भाजपानेही सत्ता स्थापनेचा पहिला मान हा काँग्रेसप्रमाणे या मलकापूर नगरीलाच दिला. त्यातही महत्त्वाचे म्हणजे उपाध्यक्षपदही याच विदर्भाचे प्रवेशद्वारी देत भाजपाने काँग्रेसमुळे सरशीच दाखविली आहे.६५ वषार्ंच्या कालावधीत १२ ऑगस्ट १९६२ रोजी बुलडाणा जिल्हा परिषदेचे पहिले अध्यक्ष होण्याचा मान काँग्रेसने मलकापूरचे बी.के.पाटील यांना दिला होता. दरम्यानच्या काळात आतापर्यंत २0 पैकी १७ जि.प. अध्यक्ष हे घाटावरचेच राहिलेत. उर्वरित तीन वेळाही अध्यक्षपद हे घाटाखाली; पण सीमेवरच्या भागातच देण्यात आले. बी.के.पाटील यांच्यानंतर जि.प. च्या इतिहासात दरम्यानच्या काळात या मलकापूरकडेही कधीही अध्यक्षपद अर्थातच अध्यक्षपदाचा लाल दिवा झळकला आहे. याच बाबीला हेरत यावेळी काहीही करून अध्यक्षपद मलकापूरला आणायचेच, हा चंग भाजपा प्रदेश उपाध्यक्ष आ.चैनसुख संचेती यांनी मनी बांधला होता. त्यादृष्टीने राजकीय असे पुरक वातावरण निर्मितीही झाली. ज्या काँग्रेसने मागीलवेळी उमा तायडे यांना अध्यक्षपदापासून दूर ठेवले, त्याच उमा तायडे यांना भाजपाने जि.प.ची सत्ता हाती घेत जि.प. च्या पहिल्या अध्यक्षपदाचा मान देत खर्‍या अर्थी त्यांचा म्हणजेच मातृशक्तीचा सन्मानच केला आहे. राजकीय अंदाजांना फोल ठरवित आजची ही निवड झाली आहे. दोन्ही पदे मलकापूरलाच? या प्रश्नाने अनेक राजकीय तज्ज्ञांच्या भुवया उंचावल्या आहेत. काँग्रेसने प्रथम सत्ता स्थापनेच्या वेळी पहिला अध्यक्षपदाचा मान मलकापूरला दिला होता, तर भाजपाने सत्ता स्थापनेचा पहिला मान हा अध्यक्षपदासह उपाध्यक्षपदही मलकापूरलाच देत खर्‍या अर्थी मलकापूरचा बहुमान वाढविला आहे. हेच आजच्या निवडीवरून स्पष्ट होत आहे, असे म्हटल्यास वावगे ठरू नये.