विनारॉयल्टी रेतीची वाहतूक करणार्‍यांना दंड

जलंब येथे विनारॉयल्टी रेतीची वाहतूक करणारे ४ ट्रॅक्टर पकडून त्यांच्याकडून प्रत्येकी ६ हजार २00 असा एकूण २४ हजार ८00 रुपये दंड वसूल.

जलंब : विनारॉयल्टी रेतीची वाहतूक करणारे ४ ट्रॅक्टर पकडून त्यांच्याकडून प्रत्येकी ६ हजार २00 असा एकूण २४ हजार ८00 रुपये दंड वसूल करण्यात आला. ही कारवाई माटरगाव येथील मंडळ अधिकारी पदमने यांनी आज १५ मे रोजी केली. हिंगणा परिसरातील पूर्णा नदीपात्रातून मोठय़ा प्रमाणात विनारॉयल्टी रेतीची वाहतूक केल्या जात आहे. याबाबत माहिती मिळाल्यानंतर आज १५ मे रोजी माटरगावचे मंडळ अधिकारी पदमने, कठोरा येथील तलाठी विश्‍वनाथ उबरहंडे, माटरगावचे तलाठी देशमुख व चोपडे आदींच्या पथकाने विनारॉयल्टी रेतीची वाहतूक करणार्‍यांवर पाळत ठेवली. यादरम्यान विठ्ठल देवीदास काळे रा.कालवड यांचे एम.एच.२८- ९६७0, विठ्ठल मधुकर देशमुख रा.अलमपूर ता.नांदुरा यांचे एम.एच.२८ टी ५२४५, संजय सदाशिव कवरे रा.कालवड यांचे एम.एच.२८ ई ५१६७, महादेव शालिग्राम मिरगे रा.जलंब यांचे एम.एच.डी. ५८६८ या ट्रॅक्टरने रेतीची एकाच रॉयल्टीवर अवैधरीत्या उत्खनन करुन वाहतूक केल्या जात असल्याचे आढळून आले. त्यामुळे मंडळ अधिकारी पदमने यांच्या पथकाने उपरोक्त क्रमांकाचे ट्रॅक्टर ताब्यात घेऊन जलंब पोलिस स्टेशनला लावण्यात आले; तसेच विनारॉयल्टी रेतीच्या चोरीप्रकरणी प्रतिट्रॅक्टर १ ब्रास याप्रमाणे प्रत्येकी ६ हजार २00 रुपये दंड भरण्याचे सांगितले. त्यामुळे उपरोक्त ट्रॅक्टरधारकांनी प्रत्येकी ६ हजार २00 याप्रमाणे एकूण २४ हजार ८00 रुपये दंड महसूल जमा केला. त्यानंतर चारही ट्रॅक्टर सोडून देण्यात आले.