वैद्यकीय अधिकारी आंदोलनाच्या पावित्र्यात !

२ जून पासून राज्य शासनाविरोधात तीव्र स्वरूपात असहकार कामबंद आंदोलन पुकारण्यात येणार असल्याचा ईशारा राज्य मॅग्मो संघटनेच्या पदाधिकार्‍यांनी निवेदनाव्दारे दिला आहे.

चिखली : वैद्यकीय अधिकार्‍यांच्या विविध प्रलंबित मागण्यांसदर्भात आंदोलनाच्या तयारीत असलेल्या महाराष्ट्र राज्य राजपत्रित अधिकारी गट - अ (मॅग्मो) संघटनेला सन २0११ मध्ये आश्‍वासन देण्यात आले होते.परंतू चार वर्षाचा कालावधी उलटूनही मागण्यांची पूर्तता न झाल्यामुळे २ जून पासून राज्य शासनाविरोधात तीव्र स्वरूपात असहकार कामबंद आंदोलन पुकारण्यात येणार असल्याचा ईशारा राज्य मॅग्मो संघटनेच्या पदाधिकार्‍यांनी निवेदनाव्दारे दिला आहे. अस्थायी ७८९ बीएएमएस वैद्यकीय अधिकारी गट ह्यबह्ण व अस्थायी जवळपास ३२ बीडीएस वैद्यकीय अधिकारी गट ह्यबह्ण यांचे सेवा समावेशन करण्यात यावे. राज्यातील सर्वच वैद्यकीय अधिकार्‍यांना सहावा वेतन आयोग लागू करण्यात यावा. आरोग्य अधिकार्‍यांना उच्च वेतन मिळावे. खातेंतर्गत पदोन्नतीचा प्रश्न मार्गी लावावा. वैद्यकीय अधिकार्‍यांचे कामांचे तास केंद्र शासन, इतर राज्यांप्रमाणे निश्‍चित करण्यात यावे, शासन दरबारी यापूर्वीच मान्य झालेल्या एनपीए ऐच्छिक असण्याबाबतची कारवाई तात्काळ करण्यात यावी, वैद्यकीय अधिकार्‍यांना एनपीए पुन:श्‍च चालू करण्यात यावा. सेवा अंतर्गत पदव्युत्तर अभ्याक्रमासंबंधी प्रलंबित जिव्हाळ्याचे प्रश्न व सेवेतील कार्यरत वैद्यकीय अधिकार्‍यांच्या दृष्टीने पदव्युत्तर अभ्यासक्रमांसंबंधी तात्काळ उचित आदर्श धोरणे ठरविण्यात यावीत. आरोग्य विभागाचा पुनर्रचना आयोग स्थापन करण्यात यावा. अशा विविध मागण्यांचे निवेदन जिल्ह्यातील वैद्यकीय अधिकार्‍यांच्यावतीने जि.प.उपाध्यक्ष पांडूरंग पाटील यांना देण्यात आले असून या मागण्यांची पूर्तता न झाल्यास २ जून पासून तीव्र स्वरूपात असहकार आंदोलन छेडण्यात येईल असा ईशारा देण्यात आला आहे. यावेळी मग्मो संघटनेचे राज्य उपाध्यक्ष डॉ.निलेश टापरे, राज्य महिला प्रतिनिधी डॉ.उज्वला पाटील, राज्य कोअर कमिटी सदस्य डॉ.प्रविणकुमार निकस, जिल्हा सचिव डॉ.सांगळे, डॉ.जयंत पाटील, डॉ.दहातोंडे, डॉ.वाकोडे, डॉ.नारखेडे, डॉ.कोतकेनवार यांच्यासह संघटनेचे पदाधिकारी उपस्थित होते.