मेहकरातील एसटीडी सेवा पडली ओस

एसटीडी बुथकडे मोबाईलमुळे कोणी फिरकत नसून ते पूर्णपणे ओस पडले आहेत.

मेहकर : गेल्या १0 वर्षापूर्वी आपल्या नातेवाईकांसह देश विदेशामध्ये संपर्क साधण्यासाठी अत्यंत महत्वाच्या ठरलेल्या दूरसंचार विभागाच्या एसटीडी बुथकडे मोबाईलमुळे कोणी फिरकत नसून ते पूर्णपणे ओस पडले आहेत. एकेकाळी दूरध्वनी हा फक्त पैसेवाल्या लोकांकडे आहे असा समज होता. एखाद्या माणसाला दूरध्वनी करायचा असेल तर दूरसंचार कार्यालयात जावून तेथे ट्रंककॉल बुक करावा लागत होते. मात्र दूरसंचार विभागाने १९९२ च्या दरम्यान एसटीडी सेवा सुरु केली व ती बघता बघता प्रचंड लोकप्रिय झाली. दूरसंचार विभागाने एसटीडी बुथला परवानगी दिल्यामुळे लाखो बेरोजगारांना काम उपलब्ध झाले. शहरापासून ग्रामीण भागातील गल्ली बोळातही एसटीडी बुथ सुरु झाले होते. छोटे छोटे व्यापार्‍यांनी तर साईड बिझनेस म्हणून बुथ सुरु केले. काचेची कॅबीन, त्याला अँल्युमिनीयमची फ्रेम अशा आकर्षक पद्धतीने बुथ असल्याने सर्वांचे लक्ष वेधून घ्यायचे. कित्येक वर्षे बुथवर दरध्वनी करण्यासाठी लोकांच्या रांगा व गर्दी असायची. अवघ्या १ रुपयांत कोठेही बोला, असे बोर्ड सर्वत्र दिसायचे. मात्र ५ ते ६ वर्षात मोबाईलच्या रुपाने क्रांतीच झाली. सुरुवातीला मोबाईलवर आऊटगोईंग आणि इनकमिंगला पैसे मोजावे लागत होते. त्यामुळे हि सेवाही पैसेवाले लोकांसाठी आहे, असे वाटत होते. परंतु काही काळातच त्यात मोठे बदल होवून ही सेवा देशभरात पसरली. मोबाईलचे दर अत्यंत कमी झाले आहेत.त्यामुळे हमाल, रिक्षावाल्यापर्यंत प्रत्येकांच्या हातात मोबाईल दिसत आहे. त्यामुळे एसटीडी बुथ सेवा सर्वत्र ओस पडलेली आहे. बस स्टेशनवर ही अंध, अपंगांसाठी राखीव ठेवलेल्या बुथवरही आता केवळ क्वाईन बॉक्सवर उपजीविका करावी लागत आहे, एव्हढे मात्र निश्‍चीत!