‘श्रीं’च्या पालखीचे बुलडाणा जिल्ह्यात आगमन

सिंदखेडराजा येथे प्रवेशद्वारावर हजारो भक्तांनी घेतले दर्शन.

सिंदखेडराजा (जि. बुलडाणा): आषाढी यात्रा आटोपून पंढरपूरच्या विठुमाउलीचे दर्शन घेऊन परत निघालेल्या श्री संत गजानन महाराजांच्या पालखीचे १३ ऑगस्ट रोजी दुपारी २ वाजता बुलडाणा जिल्ह्यात आगमन झाले. मराठवाडा-विदर्भाच्या सीमेवर माळ सावरगावच्या घाटात आ.डॉ. शशिकांत खेडेकर, राष्ट्रवादी कॉँग्रेसचे जिल्हाध्यक्ष अँड. नाझेर काझी, जगन सहाणे, गजानन तांबेकर, संवर्ग विकास अधिकारी चंद्रशेखर चेके, दिलीप आढाव, आतीश तायडे यांनी दिंडीचे स्वागत केले. मातृतीर्थ सिंदखेडराजानगरीच्या प्रवेशद्वारावर नगराध्यक्ष नंदाताई विष्णू मेहेत्रे यांनी पुष्प अर्पण करून पालखीचे स्वागत केले. शेगावीचा राणा श्री संत गजानन महाराजांची दिंडी जालना मुक्काम आटोपून विदर्भाचे प्रवेशद्वार असलेल्या माळसावरगाव शिवारात पोहचली. येथे आगमन होताच दिंडीतील सर्व वारकर्‍यांनी श्री संत गजानन महाराजांचा जयघोष करीत ह्यह्यगण गण गणात बोतेह्णह्ण च्या निनादात टाळमृदंगाच्या तालावर बेधुंद होऊन पावली खेळली. विदर्भाच्या प्रवेशद्वारावर हजारो भाविक भक्तांनी पालखीचे स्वागत करुन श्रींचे दर्शन घेतले. माळसावरगाव, तुळजापूर, नशिराबाद, अंचली येथील ग्रामस्थांनी दिंडीतील वारकर्‍यांना चहा, फराळ वाटप केले. तसेच स्थानिक जिजामाता अध्यापक विद्यालय, जिजाऊसृष्टी, मोती तलाव, संत भगवान बाबा कला विद्यालय तसेच टी पॉईंटवर भाविकांना चहा नाश्त्याची व्यवस्था करण्यात आली होती.