२० वर्षांपासून घरकूल यादीला मंजुरीची प्रतीक्षा

केंद्र व राज्य शासनाने गरिबासाठी अनेक योजना अस्तित्वात आणल्या आहेत.

सिलेगाव येथील प्रकार : योजनेवर प्रश्नचिन्हमोहन भोयर तुमसरकेंद्र व राज्य शासनाने गरिबासाठी अनेक योजना अस्तित्वात आणल्या आहेत. परंतु सिलेगाव या दोन हजार लोकसंख्येच्या गावाला मागील २० वर्षांपासून घरकूल योजनेचा लाभ मिळाला नसल्याचा गंभीर प्रकार समोर आला आहे. तुमसर तालुकास्थळापासून १३ कि़मी. अंतरावर सिलेगाव हे दोन हजार लोकसंख्येचे गाव वसले आहे. येथील गरिबांना घरकूल योजनेचा लाभ मागील २० वर्षांपासून मिळाला नाही. २० वर्षानंतरही येथील घरकूल लाभार्थी यादीला प्रशासनाच्या वतीने मंजुरी मिळाली नाही. केंद्र व राज्य शासन दरवर्षी घरकुलाकरिता कोट्यवधी रूपयांचा निधी मंजूर करीत आहे. सन २०१५-१६ मध्ये तुमसर तालुक्यात १ हजार २९९ लाभार्थ्यांना घरकूल योजनेचा लाभ मिळणार आहे. परंतु सिलेगाव येथील घरकुल लाभार्थ्यांचा यात समावेश नाही.येथील गरीब कुटुंबांवर सातत्याने अन्याय होत आहे. या गावात अनेक गरीब कुटुंब वास्तव्याला आहेत. अनेकांची घरे जीर्णावस्थेत असल्याने ती केव्हाही पडण्याची भीती निर्माण झाली आहे. ‘हातावर आणणे व पानावर खाणे’ अशी स्थिती येथील गरीबांची आहे. नियमानुसार सर्व कागदपत्र सादर केल्यावरही घरकूल यादीला मंजूरी प्रदान करण्यात येत नसल्याने यात शासनाची अनास्था दिसून येत आहे. शासनाची घरकुल योजना गावाकरिता नाही काय, असा प्रश्न येथे उपस्थित केला जात आहे.