औषधं हवी? पानटपरी, किराणा दुकानात चला!

जिल्ह्यात कुठेही आणि केव्हाही ज्याप्रमाणे खरमुरे फुटाण्यांची विक्री होते त्याचप्रमाणे किराणा दुकान ...

भंडारा : जिल्ह्यात कुठेही आणि केव्हाही ज्याप्रमाणे खरमुरे फुटाण्यांची विक्री होते त्याचप्रमाणे किराणा दुकान व पानटपऱ्यांमधून जीवघेण्या औषधांची सर्रास आणि खुलेआम विक्री सुरू आहे. ग्रामीण भागातील किराणा दुकान व राष्ट्रीय महामार्गावरील ढाब््यानजीक असलेल्या काही पानटपऱ्यांमध्ये या घातक औषधांची व्रिकी सुरू असल्याचे वास्तव ‘लोकमत’ने केलेल्या स्टिंग आॅपरेशनमध्ये उघडकीस आले. या दुकानदारांना औषधांचा पुरवठा करणाऱ्या होलसेलर्स औषध विक्रेत्यांनाही प्रशासनमधील अधिकाऱ्यांचेच पाठबळ असल्याची माहिती आहे.औषध खरेदी किंवा विक्री चुकीची झाल्यास त्याचा थेट परिणाम मानवाच्या आरोग्यावर हात असून, त्याचा जीव धोक्यात येण्याची शक्यता आहे. औषध विक्री आणि खरेदी करण्यासाठी शासनाने नियमावली ठरवून दिली. तसा कायदाही करण्यात आला असून त्याची अंमलबजावणी करण्याची जबाबदारी अन्न व औषध प्रशासन विभागाकडे देण्यात आली आहे. औषध विक्री करण्यासाठी ड्रग अ‍ॅन्ड कॉस्मेटिस अ‍ॅक्ट १९४० च्या कलम ६५ (२) नुसार अन्न व औषध प्रशासन विभागाचा परवाना आवश्यक आहे. यासोबतच रजिस्टर्ड फार्मासिस्टची उपस्थिती व डॉक्टरच्या चिठ्ठीवरच औषध विक्री करण्याचा कायदा करण्यात आला आहे. या कायद्याला जिल्ह्यातील किराणा दुकानदार व पानटपऱ्यांवर पायदळी तुडविण्यात येत आहे. किराणा दुकानदार व पानटपऱ्यांवर खुलेआम औषधांची विक्री करण्यात येत असून त्याचा परिणाम नागरिकांच्या आरोग्यावर होत असल्याची माहिती तज्ज्ञ डॉक्टरांनी दिली. या औषधांमुळे वाढत्या वयात किडणीवर परिणाम होत असून काहींना रिअ‍ॅक्शन येण्याचा धोका आहे. ग्रामीण भागात काही ठिकाणी औषध दुकान असतानाही अशा गावांमध्ये किराणा दुकानांवरही औषध मिळत असल्याचे लोकमतच्या स्टिंग आॅपरेशनमध्ये समोर आले आहे. किराणा दुकानदार व पानटपरी चालकांना दवा बाजारातील होलसेलरस औषध विक्री करीत असल्याची माहिती आहे. किरकोळ औषध विक्रेत्यांनाच औषध विक्री करून त्याचे देयक ठेवण्याचे आदेश होलसेलर्स औषध विके्रत्यांना आहेत. किराणा व पानटपऱ्यांवर मिळणारे औषध विनादेयकानेच खरेदी व विक्री करण्यात येत आहेत. (लोकमत न्यूज नेटवर्क)