भंडारा : लाखनी तालुक्यातील खराशी येथील रहिवासी असलेले डमदेव कहालकर व मीरा कहालकर यांना राज्यस्तरीय पुरस्काराने सन्मानित करण्यात आले आहे. यात मीरा कहालकर यांना राज्यस्तरीय शिक्षकरत्न पुरस्कार, तर डमदेव यांचा डॉ.बाबासाहेब आंबेडकर समाजरत्न पुरस्काराने सन्मानित करण्यात आले.
मीरा कहालकर या निमगाव येथील जिल्हा परिषद उच्च प्राथमिक शाळेत मुख्याध्यापिका म्हणून कार्यरत आहेत. सदर पुरस्कार त्यांना नागपूर येथे आयोजित सामाजिक कार्यकर्ता संमेलनात प्रदान करण्यात आला. त्यांच्या विविध शैक्षणिक, सामाजिक, राष्ट्रीय कार्याची दखल घेऊन हा पुरस्कार बहाल करण्यात आला आहे. याशिवाय शालेय नेतृत्व, नवोपक्रम, सुंदर लेखन, वाचन संस्कृती, लेखन संस्कृती यांची जपणूक, व्यसनमुक्त समाज निर्मिती यासह शिवतीर्थ मानव कल्याणकारी संस्था खराशीच्या वतीने केलेल्या विविध उपक्रमांची दखलही या पुरस्काराच्या माध्यमातून घेण्यात आली आहे.
डमदेव कहालकर यांना परिवर्तनवादी विचारांनी प्रेरित असलेल्या नागपूर येथील मदत संस्थेतर्फे श्री गुरुदेव सेवा आश्रम नागपूर येथील सभागृहात १८व्या राज्यस्तरीय सामाजिक कार्यकर्ता संमेलनात डॉ.बाबासाहेब आंबेडकर समाजरत्न पुरस्कार देऊन गौरव करण्यात आला. कहालकर यांनी शिवतीर्थ मानव कल्याणकारी बहुद्देशीय संस्था खराशीच्या वतीने गत अनेक वर्षांत विविध सामाजिक, शैक्षणिक, राष्ट्रीय कार्यक्रम राबविले आहेत. याशिवाय व्यसनमुक्त समाज निर्मितीसाठी त्यांचे अमूल्य असे योगदान आहे. विशेष म्हणजे, त्यांना आतापर्यंत विविध पातळीवर अनेक राज्य व राष्ट्रीय स्तरावरील पुरस्कार प्राप्त झाले आहेत. पुरस्कार प्रदान करताना पांडव चॅरिटेबल ट्रस्ट नागपूरचे गिरीश पांडव, ना.डॉ.नितीन राऊत, महानगरपालिकेचे विरोधी पक्षनेते तानाजी वनवे, माजी आमदार दीनानाथ पडोळे आदी उपस्थित होते.