लॉकडाऊनमुळे हातमाग विणकरांना सूत मिळेना

मुखरु बागडे। लोकमत न्यूज नेटवर्क पालांदूर : कोरोना संकटात लॉकडाऊनचा फटका सर्वच उद्योग व्यवसायाना बसत असून विणकरांचे हातही रिकामे ...

ठळक मुद्देफटका : पालांदूर येथील नऊ विणकर कुटुंबांवर उपासमारीची वेळ

मुखरु बागडे।
लोकमत न्यूज नेटवर्क
पालांदूर : कोरोना संकटात लॉकडाऊनचा फटका सर्वच उद्योग व्यवसायाना बसत असून विणकरांचे हातही रिकामे आहे. सूत मिळत नसल्याने लाखनी तालुक्यातील पालांदूर येथील नऊ कामगारांवर उपासमारीची वेळ आली आहे.
पालांदूर येथे नागपूर येथील महाराष्ट्र राज्य हातमाग महामंडळाच्या अख्त्यारित नऊ विणकर कापड विणण्याचा व्यवसाय करतात. गरीब कुटुंबातील या मंडळीचा चरितार्थ त्यावरच चालतो. त्यामुळे लॉकडाऊनमुळे त्यांच्यासमोर मोठ्या समस्या निर्माण झाल्या आहेत. पालांदूर येथे तानबा धकाते, ताराचंद धकाते श्रीराम बोकडे, नत्थु नंदनवार भोजराज नंदनवार, रामदास धकाते, माधव नंदनवार, जाधव नंदनवार, छगन नंदनवार आदी विणकर व्यवसाय करतात.
भंडारा जिल्ह्यात मोठ्या प्रमाणात विणकर बांधव आहेत. यांत्रिकीकरणाच्यापुर्वी हा समाज त्यावरच उदरनिर्वाह करायचे. मात्र यांत्रिकीकरणाचे हातमाग मागे पडला. घरात दारिद्रय पोहोचले. पालांदूरात आजही ५००च्या वर विणकर समाज स्थिरावला आहे. त्यातील काही जण गुजरातच्या सुरतमध्ये कामाच्या शोधात गेले आहे. आता लॉकडाऊनने त्यांच्यापुढेही समस्या निर्माण झाली आहे. या समाजाला लॉकडाऊनच्या काळात शासकीय योजनांचा लाभ मिळाला नसल्याचे सांगितले जाते. वरिष्ठ अधिकाऱ्यांनी याकडे लक्ष देऊन प्रश्न सोडविण्याची मागणी होत आहे.

पालांदूरच्या कापडाची ख्याती
पालांदूर येथे सिल्क कापड तयार केले जातात. दिवसभर विणकर फटफट आवाज करीत विणन्याचे काम करतात. तिक्ष्ण नजरेने विणकाम केले जाते. हाताने तयार केलेले कापड आकर्षक व टिकाऊ असल्याने त्याला मोठी मागणी आहे. मात्र सूत नागपूर येथील महामंडळाकडून पुरविल्या जात असल्याने ते खाजगीत विकू शकत नाही. सध्याच्या लॉकडाऊनमुळे सूतही मिळणे कठीण झाले आहे. परिणामी विणकर समाज अडचणीत सापडला आहे. आम्हाला तात्काळ मदत द्यावी, अशी मागणी तानबा धकाते यांनी यावेळी केली.