परतीच्या पावसाने नुकसानग्रस्त धान पिकांची पालकमंत्र्यांकडून पाहणी

लाखनी तालुक्यातील पिंपळगाव, भूगाव पंढरपूर, तुपकर मुरमाडी, साकोली तालुक्यातील विहीरगाव येथे पालकमंत्री डॉ. परिणय फुके यांनी प्रत्यक्ष भेट दिली. शेतकऱ्यांशी संवाद साधला. तसेच तलाठी, कृषीसेवक, कृषी विभाग, तालुका प्रशासन यांना लवकरात लवकर पीक नुकसानीचे पंचनामे तयार करून शासनास सादर करण्याचे निर्देश दिले.

ठळक मुद्देशेतकऱ्यांचे सांत्वन। लाखनी आणि लाखांदूर तालुक्याला भेट

लोकमत न्यूज नेटवर्क
भंडारा : परतीच्या पावसाने उद्ध्वस्त झालेल्या धान शेतीची पाहणी पालकमंत्री डॉ. परिणय फुके यांनी शनिवारी केली. लाखनी आणि लाखांदूर तालुक्यातील शेताच्या बांधावर जाऊन त्यांनी नुकसानीची पाहणी करत शेतकऱ्यांना दिलासा दिला. नुकसानग्रस्त शेतीचे पंचनामे करुन पीक मोबदला देण्याचे निर्देश दिले.
लाखनी तालुक्यातील पिंपळगाव, भूगाव पंढरपूर, तुपकर मुरमाडी, साकोली तालुक्यातील विहीरगाव येथे पालकमंत्री डॉ. परिणय फुके यांनी प्रत्यक्ष भेट दिली. शेतकऱ्यांशी संवाद साधला. तसेच तलाठी, कृषीसेवक, कृषी विभाग, तालुका प्रशासन यांना लवकरात लवकर पीक नुकसानीचे पंचनामे तयार करून शासनास सादर करण्याचे निर्देश दिले. यावेळी रमेश दोनोडे, रामचंद्र डोनाडकर, अनंता कमाणे, शकुंतला कठाणे, संदीप निरगुले, हरिदास दोनोडे, मोतीराम तवाडे, फकिरा बारस्कर, ताराचंद दोनोडे यांच्या शेतात जावून पाहणी केली.
लाखांदूर तालुक्यातील दिघोरी (मोठी) येथील प्रेमराज करंजेकर, निंबुना चिमणकर, गोपीचंद अवचट, श्रीराम अवचट, सुभाष हुकरे, चंद्रभान सेलोकर, कृष्णा देशमुख यांच्या शेताची पाहणी पालकमंत्री डॉ. फुके यांनी करुन चौकशीचे निर्देश दिले.
याप्रसंगी खासदार सुनील मेंढे, माजी आमदार बाळा काशीवार, जिल्हा परिषद सदस्य डॉ. नेपाल रंगारी, माधुरी हुकरे, मार्तंड हुकरे, सरपंच अरुण गभने, विनोद ठाकरे, नरेश खरकाटे, नुतन कांबळे, कोमल गभणे, मिलिंद टिचकुले, संदीप भांडारकर, राधेश्याम मुंगमोडे, शेषराव वंजारी, बाला शिवणकर, भुमेश ढेंगे, प्रविण दोनोडे, मंगेश मेश्राम, तहसीलदार मल्लीक वीरानी, तालुका कृषी अधिकारी पद्माकर गिदमारे, पोलीस पाटील सुरेश मते उपस्थित होते.