शिरूर कासार : किशोर वयात काही समज येण्याआधीच आपण नको त्या गोष्टी करून भविष्याची बरबादी करून पश्चाताप करण्याची वेळ येते. हा धोका मुलांप्रमाणे मुलींना सुद्धा घातक ठरतो. किशोरवयीन मुला- मुलींनी आमिषाला बळी न पडता काही बाबतीत नाही म्हणायचे धाडस करावे, असे मार्गदर्शन येथे एका कार्यक्रमात करण्यात आले.
येथील प्राथमिक आरोग्य केंद्रात किशोरावस्थेतील मुला-मुलींना देण्यात आले. तालुका आरोग्य अधिकारी डॉ. अशोक गवळी व आरोग्य कर्मचाऱ्यांनी यावेळी सर्व बाबी मुद्देसूद हाताळून मोलाचे मार्गदर्शन केले. १५ ते १९ या वयोगटांतील मुलांना व मुलींना किशोरवयीन समजले जाते. हे वय असे असते की आपण करत असलेल्या चुकांचे परिणाम त्यांच्या लक्षात येत नाही यातून मोठे भरून न निघणारे नुकसान होत असते. नेमके हेच टाळण्यासाठी व बालविवाह आणि त्याचे परिणाम याबद्दल डॉ. अशोक गवळी, एस. बी. वाघूलकर, बी. जे. ढाकणे, एस. आर. जोगदंड यांनी मार्गदर्शन केले.
दवाखान्यातील पलंग स्वर्ग नव्हे
बालविवाह टाळणे ही सर्वांचीच जबाबदारी आहे. स्वच्छतेबाबतही सूचना देण्यात आल्या. आकर्षणापोटी प्रलोभन, आमिष दाखवित एकमेकांना किशोरवयीन बोलत असतात. प्रामुख्याने यातून व्यसनाच्या आहारी जाण्याचा धोका असतो. मात्र हे या वयात लक्षात येत नाही. धूम्रपान, मद्यपानाच्या आहारी जातात व दुसऱ्यालाही प्रवृत्त केले जात असते. अशावेळी किशोरवयीन मुलांनी नाही म्हणण्याचे धाडस केले पाहिजे. धूम्रपानासंदर्भात दवाखान्यातील पलंग म्हणजे स्वर्ग आहे का ? अशा शब्दांत समज देणे गरजेचे आहे. अशा अनेक बाबी यावेळी सांगण्यात आल्या.
अशा बाबी घातकच
आपण करतो ते कोणालाच माहिती होणार नाही, ही गोष्ट दोघांमध्येच राहील असे बोलणे घात करू शकते, किशोरवयीन गर्भारपण शारीरिक दृष्ट्या विपरित परिणामकारक ठरते. याबरोबर भ्रूणहत्या, स्त्रियांवरील हल्ला, ऑनर किलिंग, जबरदस्ती बालविवाह, लग्नासाठी अपहरण, घरगुती हिंसा ,घालून पाडून बोलणे, मारझोड करणे, शोषण, अत्याचाराचा परिणाम मुलींच्या आरोग्यावर व प्रगतीवर होत असल्याचे सांगण्यात आले.