पर्यटन केंद्रावर बंदोबस्त वाढवावा
अंबाजोगाई : अंबाजोगाई शहर व परिसरात अनेक ठिकाणी तलाव, धबधबे आदी पर्यटन केंद्र आहेत. पावसाळ्यात तलाव व धबधबा ओसंडून वाहत असल्याने येथे अनेकजण फिरण्यासाठी जातात. अति उत्साहीपणामध्ये अनेकांनी जीव गमावला आहे. त्यामुळे अशा घटना टाळण्यासाठी येथे पोलीस बंदोबस्त ठेवण्यात यावा, अशी मागणी होत आहे.
पाणी साठविण्याची गरज
अंबाजोगाई : दरवर्षी अंबाजोगाई शहराला पाणी टंचाईचा सामना करावा लागतो. मोठा पाऊस होऊनही आठवड्यातून एकदा पाणी मिळते. मात्र तरीसुद्धा रेनवॉटर हार्वेस्टिंग बाबत जनजागृती करण्यात येत नाही. त्यामुळे नगरपरिषदेच्या वतीने याबाबत जनजागृती करणे गरजेचे आहे. सर्वांनी रेन व्हॉटर हार्वेस्टिंग उपक्रम आपल्या घरी केल्या मोठ्या प्रमाणात पाणी जमिनीत मुरेल आणि पाणी पातळी वाढण्यास मदत होईल, अशी मागणी सामाजिक कार्यकर्ते डॉ. निशिकांत पाचेगावकर यांनी केली आहे.
विद्यार्थ्यांची अडचण
अंबाजोगाई : पोलीस किंवा आर्मी भरतीमध्ये ज्या विद्यार्थ्यांना जाण्याची इच्छा असते. अशी मुले एनसीसीमध्ये सहभागी होतात. काहीजण आठवी पासून तर काहीजण अकरावीपासून एनसीसीची निवड करतात. मात्र कोरोनामुळे शाळा महाविद्यालये बंद असून ऑनलाईन शिक्षण सुरु आहे. त्यामुळे बहुतेक शाळा, महाविद्यालयात एनसीसीची परेड होत नाही. त्यामुळे विद्यार्थ्यांना अडचण होत असून भविष्याची त्यांना चिंता सतावत आहे.
शेतकऱ्यांना बांधावर जाऊन मार्गदर्शन करणे गरजेचे
अंबाजोगाई : शेतकऱ्यांचे उत्पादन वाढावे, यासाठी कृषी विभागातर्फे शेतकऱ्यांना मार्गदर्शन करण्यात येते. परंतु, ग्रामीण भागात कृषी विभागातील अधिकारी शेतकऱ्यांच्या बांधावर न जाताच शेतकऱ्यांना सल्ला देतात. परंतु, ग्रामीण भागातील शेतकरी कृषी विभागात जावून साधी माहिती घेत नाही, त्यामुळे कृषी विभागाने प्रत्यक्ष शेतकऱ्यांच्या बांधावर जाऊन शेतकऱ्यांनी मार्गदर्शन करावे, तेव्हाच शेतकऱ्यांचे उत्पादन वाढण्यास मदत होईल.
एक खिडकी योजना राबवा
अंबाजोगाई : प्रत्यक्ष शाळा सुरु झाली नसली तरी ऑनलाईन शाळा सुरु झाली आहे. त्यामुळे विद्यार्थ्यांना विविध कागदपत्राची गरज भासत आहे. शासनाने मागील काही वर्षापूर्वी एक खिडकी ही योजना राबवून शिक्षणासाठी आवश्यक असणारी सर्व कागदपत्रे देण्याची मोहीम राबवली होती. कोरोनाचा काळ असल्याने एक खिडकी मोहीम राबवावी, अशी मागणी ॲड. सुभाष शिंदे यांनी केली आहे.