अविनाश मुडेगावकर/
लोकमत न्यूज नेटवर्क
अंबाजोगाई : अंबाजोगाईच्या उपप्रादेशिक परिवहन कार्यालयांमध्ये लर्निंग लायसन्स, पक्के लायसन्स, वाहनांची नोंदणी, वाहने नावावर करणे, वाहनांचे पासिंग करणे आदी विविध कामांसाठी मोठ्या प्रमाणावर नागरिक येत असतात; परंतु कोरोनाच्या पार्श्वभूमीवर या कार्यालयातील नागरिकांची गर्दी कमी करण्याचा राज्य सरकारचा प्रयत्न आहे. त्यासाठी ऑनलाइन लर्निंग लायसन्स काढण्याची सुविधा सुरू करण्यात आली आहे; मात्र याबाबत पुरेशी न झालेली जागृती तसेच अनेक ठिकाणी इन लर्निंग लायसन्स काढण्यासाठी येणाऱ्या अडचणी, यामुळे नागरिकांचा अजूनही प्रत्यक्ष कार्यालयात जाऊन लायसन्स काढण्यावर भर दिसून येत आहे.
अंबाजोगाई येथील उपप्रादेशिक परिवहन कार्यालयांतर्गत माजलगाव, परळी, धारूर, केज आदी शहरे येतात. त्यामुळे दररोज येथून मोठ्या प्रमाणावर नागरिक वाहनाशी संबंधित कामांसाठी आरटीओ कार्यालयात येतात. त्यामुळे येथे मोठ्या प्रमाणावर नागरिकांची गर्दी होते. कोरोनाचा काळ लक्षात घेता नागरिकांना घरबसल्या लर्निंग लायसन्स ऑनलाईन मिळणार असल्याने मोठा दिलासा मिळणार आहे.
नागरिकांना या सुविधेबाबत विचारले असता त्यांनी माहिती नसल्याने आपण कार्यालयात आल्याचे सांगितले. ऑनलाइनद्वारे लर्निंग लायसन्स कसे काढायचे? त्यात चूक झाली तर काय? लायसन्स मिळाले नाही तर काय? करायचे असे प्रतिप्रश्न त्यांनी विचारले. त्यामुळे याबाबत जनजागृती करणे, शिबिरे घेऊन मार्गदर्शन करणे गरजेचे असल्याचे मत अनेकांनी आमच्या प्रतिनिधींशी बोलताना व्यक्त केले.
....
ऑनलाइनसाठी अडचणी काय?
ऑनलाइनद्वारे लायसन्स काढताना अनेकदा इंटरनेट हँग होते. आरटीओची वेबसाईट कोणती? ती मिळाल्यास कोणत्या पेजवर जाऊन अर्ज करायचा. याबाबत नागरिकांमध्ये मोठा गोंधळ आहे.
लर्निंग लायसन्ससाठी ऑनलाइन पेपर कसा द्यायचा, याची माहितीही अनेकांना नाही.
ऑनलाइन प्रक्रिया किचकट वाटत असल्याने अनेक जण थेट आरटीओ कार्यालयात जाणेच पसंत करतात.
...
...म्हणून आरटीओ कार्यालय गाठले
आरटीओच्या वेबसाईटची माहिती नाही. मार्गदर्शन करायला कोणी नाही. त्यापेक्षा वेळ गेला तरी थेट आरटीओ कार्यालयात जाऊन लायसन्स काढणे सोपे वाटते. कोविड असल्याने जरी नियम कडक असले, तरी काही तासांत काम होते.
-एक लाभार्थी.
....
ऑनलाइनद्वारे थेट लायसन्सची सुविधा सरकारने दिली असली तरी अद्याप त्याची सुरुवात झाली आहे का हा प्रश्न आहे. वेबसाईटची लिंक मिळवून, त्यात अर्ज करणे, परीक्षा देणे किचकट वाटते. त्यापेक्षा कार्यालयात येऊन लर्निंग लायसन्स काढणे सोपे वाटले. अधिकारीही येथे चांगले मार्गदर्शन करीत आहेत.
-एक लाभार्थी.
....
उमेदवार वेगळा, परीक्षा देणारा दुसराच
ज्याला लायसन्स काढायचे त्याच्या नावावर दुसराच कोणीतरी परीक्षा देत असल्याचा प्रकार घडू नये, यासाठी या ठिकाणी काळजी आरटीओ कार्यालयात घेण्यात येत आहे. ऑनलाइन परीक्षेवेळी हा घोळ होऊ शकतो. त्यामुळे पारदर्शकता किती राहील हा मोठा प्रश्न असल्याचे जाणकारांचे मत आहे.
....
ऑनलाइन लर्निंग लायसन्सची सुविधा सुरु असली तरी नागरिकांना आरटीओ कार्यालयात येऊन लर्निंग लायसन्स काढणे सोपे जात आहे. अनेकांनी त्याचा प्रयत्नही केलेला नाही. आठवडाभरापासून अनेकजण कामानिमित्त कार्यालयात येत आहेत. त्यामुळे कोविडचे सगळे नियम पाळून सकाळी ९ ते दुपारी ४ दरम्यान कामकाज सुरू आहे. दिवसाला २२ ते २५ नागरिकांना लर्निंग लायसन्स दिले जात आहे. लॉकडाऊनपूर्वी ही संख्या दिवसाला ७० पर्यंत होती.
-दत्तात्रय सांगोलकर, उपप्रादेशिक परिवहन अधिकारी, अंबाजोगाई.
....
किती लायसन्स दिले?
लर्निंग लायसन्स
२०१९-२०२०-३७९०४
२०२०-२०२१-३२७९३
...
पर्मनंट लायसन्स
२०१९-२०२०-११६००
२०२०-२०२१-१०१४१
...
आतापर्यंत ई-पद्धतीने दिलेले लर्निंग लायसन्स-१७४