भुरळ टाकून महिलेची ५६ हजार रुपयांची फसवणूक

परळी : नकली सोन्याचे बिस्किट सापडल्याच्या नादात अंगावरील असली सोन्याचे दागिने देऊन महिलेने स्वत:ची फसवणूक करून घेतली. दागिन्याच्या बदल्यात मिळालेले बिस्किट सोन्याचे नसून पितळाचे असल्याचे नंतर महिलेच्या निदर्शनास आले.

११ ग्रॅमचे बिस्किट हरवले होते, ते तुम्हाला सापडले होते. ते मला परत द्या किंवा तुमच्या अंगावरील सोन्याचे दागिने काढून द्या असे म्हणून भुरळ पाडून महिलेच्या अंगावरील ५६ हजार रुपये किमतीचे सतरा ग्रॅम सोन्याचे दागिने काढून घेऊन दोघा अनोळखी व्यक्तींनी फसवणूक केली. शहरातील कावेरी लॉज मार्गावरील एका बँकेजवळ सोमवारी हा प्रकार घडला. याप्रकरणी महिलेच्या तक्रारीवरून दोघांवर सोमवारी रात्री परळी शहर पोलीस ठाण्यात गुन्हा दाखल करण्यात आला आहे.

सोमवार हा आठवडी बाजाराचा दिवस होता. या दिवशी सकाळी साडेदहा वाजता शहरातील वडसावित्री नगर भागातील सुनीता नवनाथ गीते (वय ५०) या स्वतःच्या किराणा दुकानावर पाणी पाऊच खरेदीसाठी बँकेच्या परिसरात आल्या होत्या. तेव्हा त्यांना सोन्यासारखे दिसणारे बिस्किट सापडले. तेथून गीते या घराकडे निघाल्या. तेवढ्यात त्या ठिकाणी दोन अनोळखी इसम आले व आमचे अकरा ग्रॅमचे सोन्याचे बिस्किट हरवले होते, ते तुम्हाला सापडले होते. ते मला परत द्या किंवा तुमच्या अंगावरील दागिने काढून द्या म्हणून दोघा व्यक्तींनी या महिलेस भुरळ पाडली. अंगावरील ५६ हजार रुपये किमतीचे सोन्याचे दागिने काढून देण्यास परावृत्त केले. भुरळ पडल्यामुळे महिलेने अंगावरील दागिने दोघा अनोळखी व्यक्तींना दिले. याप्रकरणी आपली फसवणूक झाल्याची तक्रार सुनीता गित्ते यांनी परळी शहर पोलिस ठाण्यात दिली आहे. त्यावरून दोघा जणांविरुद्ध फसवणुकीचा गुन्हा दाखल करण्यात आला आहे .

या प्रकरणाचा तपास पोलीस निरीक्षक हेमंत कदम यांच्या मार्गदर्शनाखाली पोलिस जमादार चव्हाण हे करीत आहेत. ४२ मण्यांची एक बोरमाळ, एक सेवनपीस व कानातील झुंबर असे एकूण ५६ हजार ६६१ रुपये किमतीचे दागिने दोघा व्यक्तींनी फसवणूक करून घेतले व मोटरसायकलवर बसून पळून गेले. महिलेच्या अंगावरील दागिने पाहून त्या दोघा व्यक्तीपैकी एका व्यक्तीने रस्त्यावर नकली सोन्याचे बिस्किट टाकले होते. हे बिस्किट त्या महिलेने उचलल्याचे पाहून पुढे जाऊन दोघांनी गाठले व आमचे बिस्किट आहे म्हणून त्या महिलेस भुरळ पाडली व महिलेच्या अंगावरील दागिने काढून घेतले. नकली सोन्याचे बिस्किट पोलिसांनी ताब्यात घेतले आहे, या प्रकरणातील आरोपींचा पोलीस शोध घेत आहेत. आरोपींच्या शोधासाठी पोलिसांचे पथक कामाला लागले आहे