बीड : बीड जिल्हा बिल्डर्स ॲन्ड डेव्हलपर्स असोसिएशनच्या (क्रेडाई) अध्यक्षपदी अतुल संघाणी व सचिवपदी पारस ललवाणी यांची एकमताने निवड झाली.
वैभव क्षीरसागर यांच्या अध्यक्षतेखाली झालेल्या क्रेडाईच्या सर्वसाधारण सभेत नूतन कार्यकारिणीची निवड झाली. अध्यक्ष अतुल संघाणी, सचिवपदी पारस ललवाणी व कोषाध्यक्षपदी संजय आंबेगावे यांचा नूतन कार्यकारिणीत समावेश आहे. मावळते अध्यक्ष समीर काझी व मावळते सचिव संतोष जाधव यांनी नूतन अध्यक्ष, सचिवांकडे पदभार सोपवला.
२००३ पासून क्रेडाई बीड ही बांधकाम व्यावसायिकांची संघटना कार्यरत आहे. संघटना मजबूत करण्यासाठी माजी अध्यक्ष सूरज तेंडूलकर,वैभव क्षीरसागर,समीर काझी, इंजि. उत्तमराव मिसाळ व संतोष जाधव यांनी मोलाचे कार्य केले आहे .
व्यवसायाबरोबरच जिल्ह्यामध्ये वृक्षारोपण,रक्तदान शिबिर व इतर सामाजिक उपक्रम संघटनेमार्फत राबविले जातात. ग्रामीण भागात संगणक, टॅबची उपलब्धता नसणाऱ्या मुलांसाठी क्रेडाईने ई-लायब्ररी प्रकल्प नुकताच हाती घेतला आहे.
आगामी दोन वर्षाच्या कार्यकालामध्ये क्रेडाई कार्यालयाचे निर्माण, या क्षेत्रातील कामगारांचे लसीकरण,शहरातील विविध चौकांचे सुशोभिकरण, कामगार नोंदणी तसेच महाराष्ट्र शासनाच्या नवीन बांधकाम प्रणालीचे सेमिनार घेण्याचा मानस नूतन अध्यक्ष अतुल संघाणी व सचिव पारस ललवाणी यांनी व्यक्त केला.