Beed Crime: बीड हादरले! भावी इंजिनियरचा चाकूने भोसकून खून, कायदा-सुव्यवस्थेचा प्रश्न ऐरणीवर

Beed Crime शहराच्या मध्यवर्ती ठिकाणी घटना, बीडमध्ये कायदा व सुव्यवस्थेचा प्रश्न पुन्हा ऐरणीवर

बीड: शहरात बुधवारी रात्री साडे आठ वाजण्याच्या सुमारास यश देवेंद्र ढाका (वय २२, रा. बीड) या तरुणाचा चाकूने वार करून खून करण्यात आल्याची घटना माने कॉम्प्लेक्स परिसरात घडली आहे. छातीत झालेले दोन वार आरपार गेल्याने यश ढाका रक्तबंबाळ झाला होता. जखमी अवस्थेत त्यांना तातडीने जिल्हा रुग्णालयात दाखल करण्यात आले, परंतु डॉक्टरांनी त्याला मयत घोषित केले. यश हा इंजिनियरींगचे शिक्षण घेत होता.

बूधवारी रात्री शहरातील गजबजलेल्या माने कॉम्प्लेक्स भागात हा खून झाल्याने बीडमधील कायदा व सुव्यवस्थेचा प्रश्न पुन्हा एकदा ऐरणीवर आला आहे. शहरातील नागरिक आणि गुन्हेगारांमध्ये पोलिसांचा कसलाही धाक राहिला नसल्याचे या घटनेवरून स्पष्ट होते.

खूनाचे नेमके कारण आणि मारहाण करणारे आरोपी कोण आहेत, हे अद्याप समोर आलेले नाही. या घटनेनंतर आरोपींचा शोध घेण्यासाठी पोलिसांकडून तातडीने तपास सुरू करण्यात आला आहे. शहराच्या मध्यवर्ती ठिकाणी घडलेल्या या घटनेमुळे शहरात भीतीचे वातावरण निर्माण झाले आहे.