‘ती’ अल्पवयीन मिळाली अमरावतीत

धामणगाव रेल्वे : अपहरण झालेल्या जुना धामणगाव परिसरातील अल्पवयीन मुलीचा दत्तापूर पोलिसांनी शोध घेतला. ती शनिवारी सायंकाळी साडेसात वाजताच्या सुमारास अमरावतीत मिळाली. जुना धामणगाव परिसरातील एका कॉलनीतील अल्पवयीन मुलीचे अपहरण केल्याची घटना २० जुलै रोजी घडली होती.

तीन वर्षांपूर्वी अल्पवयीन मुलीची आई स्वत:वर झालेल्या बलात्काराच्या प्रकरणात साक्षीसाठी २० जुलै रोजी अमरावती येथे गेली होती. आईची प्रकृती बिघल्याचे सांगून शहरातील शास्त्री चौक परिसरातील सिंधी मोहल्ला येथून फिकट रंगाच्या व्हॅनमध्ये बसवून तीन मुलांनी तिला पळवून नेल्याची तक्रार कुटुंबाने दत्तापूर पोलीस ठाण्यात नोंदविली होती. हा तपास पोलीस उपनिरीक्षक द्वारका आंबोरे यांनी करून २२ जुलै रोजी दोन आरोपींना ताब्यात घेतले व चौकशी करून भादंविच्या कलम ३६३, ३६६ अ व ३४ अन्वये गुन्हा दाखल केला. मात्र, ती अल्पवयीन मुलगी बेपत्ता होती. दत्तापूर पोलिसांनी धामणगाव शहर तसेच रेल्वे स्थानकावरील सीसीटीव्ही तपासणी केली होती. दत्तापूरचे ठाणेदार ब्रह्मदेव शेळके यांनी एक पथक अमरावती येथे रवाना केले होते. यादरम्यान शनिवारी सायंकाळी साडेसात वाजता बसस्थानक परिसरातील अल्पवयीन मिळाली. ती कुणासोबत गेली होती, या प्रकरणात आणखी काही आरोपी आहेत का, याविषयी दत्तापूर पोलीस तपासणार आहेत.