अमरावती : जिल्हा मध्यवर्ती सहकारी बँकेतील ३.३९ कोटी रुपयांच्या आर्थिक गैरव्यवहारप्रकरणी गुन्हा दाखल झालेले बँकेचे तत्कालीन मुख्य कार्यकारी अधिकारी जयसिंग राठोड यांना सक्तवसुली संचालनालय (ईडी) ने समन्स बजावले आहेत. त्यांना ७ सप्टेंबर रोजी सकाळी ११ वाजता ईडीच्या मुंबई स्थित कार्यालयात उपस्थित राहावे लागणार आहे. बँकेची सार्वत्रिक निवडणूक घोषित झाल्याच्या पार्श्वभूमीवर ईडीच्या समन्समुळे सहकारक्षेषेत्रात मोठी खळबळ उडाली आहे.
इडीच्या मुंबई स्थित कार्यालयाचे सहायक निदेशक अमिताभ मलिक यांच्या स्वाक्षरीचा हा समन्स २८ ऑगस्ट रोजी बजावण्यात आला आहे. राठोड यांनी स्वत: उपस्थित राहावे किंवा त्यांचा अधिकृत प्रतिनिधीदेखील चालेल, असेही समन्समध्ये नमूद आहे. ईडीच्या समन्समुळे सहकार क्षेत्रात मोठी खळबळ उडाली आहे.
जिल्हा बँकेने सन २०१७ ते २०२० दरम्यान एका खासगी कंपनीत ७०० कोटी रुपयांची गुंतवणूक केली. त्या व्यवहारापोटी देण्यात आलेल्या ३.३९ कोटी रुपयांच्या दलालीमुळे बँकेची फसवणूक झाली, अशी तक्रार प्रशासकाने १५ जून रोजी शहर कोतवाली पोलिसांत नोंदविली होती. त्यांच्या तक्रारीवरून पोलिसांनी बँकेचे तत्कालीन मुख्य कार्यकारी जयसिंग राठोड यांच्यासह पाच अधिकारी-कर्मचारी, संबंधित कंपनीचा स्थानिक व्यवस्थापक व ब्रोकर्स अशा एकूण ११ जणांविरुद्ध फसवणूक, गुन्हेगारी स्वरूपाचा कट आदी गुन्हे दाखल करण्यात आले होते. सध्या या प्रकरणाचा तपास आर्थिक गुन्हे शाखा करीत आहे.
बॉक्स
ईडीने मागविली होती माहिती
यापुर्वी याप्रकरणाची संपूर्ण माहिती ईडीने जिल्हा उपनिबंधकांकडून मागवून घेतली होती. तत्कालीन जिल्हा उपनिबंधक संदीप जाधव यांनी स्वत: हजर राहून लेखापरीक्षण अहवालासह संपूर्ण दस्तावेज ईडीच्या मुंबई कार्यालयाकडे सोपविला होता.
////////
राठोडांकडून नो आन्सर
याबाबत जयसिंग राठोड यांच्याशी संपर्क साधला असता, त्यांनी प्रतिसाद दिला नाही.