अमरावती : ऑटो चोरी करणाऱ्या आंतरजिल्हा टोळीला शहर गुन्हे शाखेच्या पथकाने जेरबंद केले. पोलिसांनी या प्रकरणी टोळीतील दोन आरोपींना अटक केली. ही कारवाई ४ फेब्रुवारी रोजी करण्यात आली होती.
उबेद खान वल्द वहिद खान (२३, रा. नायगाव अकोट फैल, अकोला) याला पोलिसांनी अकोला येथून ताब्यात घेऊन विचारपूस केली असता आरोपी मोहम्मद मुदस्सीर युनुस (रा. तारफैल, अकोला) याच्यासोबत ऑटो चोरीचा गुन्हा केल्याची आरोपीने कबुली दिली. मोहम्मद मुदस्सीर मोहम्मद युनुस यास न्यायालयातून प्रोडक्शन वाॅरंट घेऊन सदर गुन्ह्यात अटक केली. तो मध्यवर्ती कारागृहात होता.
२० जून २०२० रोजी फ्रेजरपुरा ठाणे हद्दीतील अप क्रमांक ५७४/२०२० कलम ३३७ अन्वये गुन्हा दाखल होता. या गुन्ह्याचा तपास करीत असताना गुन्हे शाखेच्या पथकाने सदर आरोपीला अटक केली.
आरोेपीने फ्रेजरपुरा हद्दीतील गुन्ह्यातील एक लाख रुपये किमतीचा ऑटो जप्त केला तसेच सदर आरोपीकडून वलगाव हद्दीतून ५० हजार रुपये किमतीचा ऑटो, राजापेठ हद्दीतून दीड लाखाचा ऑटो याव्यतिरिक्त चार लाख रुपये किमतीचे आणखीन दोन ऑटो तसेच एक लाखाची महागडी दुचाकी असा एकूण आठ लाखांचा मुद्देमाल पोलिसांनी जप्त केला. सदर आरोपीला मंगळवारपर्यंत पोलीस कोठडी मिळाली आहे. ही कारवाई पोलीस आयुक्त आरती सिंह यांच्या मार्गदर्शनात गुन्हे शाखेचे पोलीस निरीक्षक कैलाश पुंडकर यांच्या नेतृत्वात एपीआय जे.एन. सय्यद, पोलीस हवालदार प्रकाश जगताप, दीपक दुबे, सय्यद इम्रान, फिरोज खान, मोहम्मद सुलतान, चेतन कराळे, चालक अमोल बहाद्दरपुरे आदींच्या पथकाने केली. आरोपीकडून आणखीने गुन्हे उघडकीस येण्याची शक्यता आहे.