फोटो - पी/२७/शहीद फोल्डर
परतवाडा : अचलपूर तालुक्यातील पिंपळखुटा येथील सैनिक कैलास दहिकरच्या पार्थिवावर देवगाव शिवारात सातपुडा पर्वताच्या साक्षीने शासकीय इतमामात अंत्यसंस्कार पार पडला. या दरम्यान सशस्त्र सैन्य दलासह राज्य पोलीस दलाकडून त्याला मानवंदना देण्यात आली. मेळघाटच्या पंचक्रोशीतून याप्रसंगी जनसागर उसळला होता. अमर रहे, अमर रहे, भारत माता की जयच्या गगनभेदी घोषणांनी परिसर दुमदुमून गेला होता.
रविवार २७ डिसेंबरला नागपूरहून दुपारी २ वाजताच्या दरम्यान कैलासचे पार्थिव पिंपळखुटा येथे दाखल झाले. ते परतवाडा शहरासह मार्गातील धोतरखेडा, एकलासपूर, धामणगाव गढीतील युवकांसह पुरुष व महिलांनी एकत्र येत हातात तिरंगा घेत मार्गावर उभे राहून त्यास श्रद्धांजली अर्पण केली.
पिंपळखुटा गावासह देवगाव परिसरात प्रत्येक घरांपुढे सडासारवण करीत रांगोळ्या काढण्यात आल्या होत्या. सर्वप्रथम कैलासचे पार्थिव पिंपळखुटा येथील त्याच्या निवासस्थानी नेण्यात आले. त्यानंतर फुलांनी सजवलेल्या ट्रॅक्टररुपी रथावर ते पार्थिव ठेवून अंतिमसंस्कार स्थळी आणल्या गेले.
दत्तप्रभू आश्रमशाळेमागील गजानन येवले यांच्या शेतात त्या पार्थिवावर शासकीत इतमात त्याच्या कुटुंबीयांच्या उपस्थितीत अंत्यसंस्कार पार पडले. यात ज्या तिरंग्यात त्याचे पार्थिव आणल्या गेले तो तिरंगा सैन्यदलाकडून सन्मानपूर्वक त्याची पत्नी बबलीच्या स्वाधीन करण्यात आला. आई, वडील, पत्नी, भाऊ, मुलगीसह नातेवाईकांनी त्याचे मुखदर्शन घेतले. धार्मिक रुढीपरंपरेनुसार विधी आटोपून त्याचा लहान भाऊ केवल दहिकर याने कैलासच्या पार्थिवाला अग्नी दिला.
अग्नीदाहपूर्वी राज्य शासनाच्यावतीने पालकमंत्री ना. यशोमती ठाकूर यांनी, तर प्रशासनाच्यावतीने अचलपूर एसडीओ संदीपकुमार अपार यांनी पुष्पचक्र अर्पण केले. राज्यमंत्री बच्चू कडू, मेळघाटचे आमदार राजकुमार पटेल, माजी आमदार केवलराम काळे, खासदार नवनीत राणा, जि. प. सदस्य प्रताप अभ्यंकर, बहादुर आजी-माजी सैनिक संघ, देवगावचे सरपंच गजानन येवले, सुरेखा ठाकरे यांच्यासह उपस्थित मान्यवरांनी सैनिक कैलासच्या पार्थिवावर पुष्पचक्र अर्पण केले. मान्यवरांनी आपली जाहीर श्रद्धांजली याप्रसंगी अर्पण केली. अखेर राष्ट्रगीतासह भारत माता आणि अमर रहे। अमर रहे, वंदे मातरमच्या जयघोषाने सैनिकाला अखेरचा निरोप देण्यात आला. याप्रसंगी महिलांसह शालेय विद्यार्थ्यांची उपस्थिती अधिक राहिली.