‘अजुबा’कडे आढळला आठ किलो गांजा गुन्हे शाखेची मोठी कारवाई; वडाळीजवळ आवळल्या मुसक्या

या प्रकरणी एका २४ वर्षीय तरुणाला बेड्या ठोकण्यात आल्या आहेत. रविवार २५ जानेवारी रोजी नागपूर-अमरावती एक्सप्रेस हायवेवरील वडाळी सर्व्हिस रोडजवळ ही कारवाई करण्यात आली. योगेश ऊर्फ अजुबा धनराज रायकवार (वय २४, रा. रतनगंज, अमरावती) असे अटक आरोपीचे नाव आहे.

अमरावती: शहरात अमली पदार्थांच्या विक्रीविरुद्ध पोलिसांनी कंबर कसली असून, शहर गुन्हे शाखेने एका धडक कारवाईत ८ किलो १०५ ग्रॅम गांजा जप्त केला आहे. या प्रकरणी एका २४ वर्षीय तरुणाला बेड्या ठोकण्यात आल्या आहेत. रविवार २५ जानेवारी रोजी नागपूर-अमरावती एक्सप्रेस हायवेवरील वडाळी सर्व्हिस रोडजवळ ही कारवाई करण्यात आली. योगेश ऊर्फ अजुबा धनराज रायकवार (वय २४, रा. रतनगंज, अमरावती) असे अटक आरोपीचे नाव आहे.

एफआयआरनुसार, गुन्हे शाखेचे पथक आयुक्तालय हद्दीत पेट्रोलिंग करत असताना, नागपूर-अमरावती एक्सप्रेस हायवेवरील वडाळी सर्व्हिस रोडजवळ एक तरुण मोठ्या प्रमाणात गांजा विक्रीसाठी येणार असल्याची गुप्त माहिती मिळाली. या माहितीच्या आधारे पोलिसांनी सापळा रचून योगेश ऊर्फ अजुबा रायकवार याला ताब्यात घेतले.

त्याच्याकडून १,६२,१०० रुपये किमतीचा ८ किलो १०५ ग्रॅम गांजा, १० हजारांचा मोबाईल असा एकुण १ लाख ७२ हजार १०० रुपयांचा मुद्देमाल जप्त करण्यात आला आहे. आरोपीविरुद्ध फ्रेजरपुरा पोलीस स्टेशनमध्ये एनडीपीएस ॲक्टनुसार गुन्हा दाखल करण्यात आला आहे. ही कारवाई पोलीस आयुक्त राकेश ओला यांच्या मार्गदर्शनाखाली गुन्हे शाखेचे पोलीस निरीक्षक संदीप चव्हाण व सीमा दाताळकर यांच्या पथकाने केली.