अमरावती : कोरोना लसीकरणाच्या प्रक्रियेने आता गती पकडली आहे. लक्ष्यपूर्ती लवकर व्हावी, यासाठी लसीकरण केंद्राची संख्या पाचऐवजी ११ केल्याचे जिल्हा शल्यचिकित्सकांनी सांगितले.
जिल्ह्यात लसीकरणासाठी सुरुवातीला नऊ केंद्रांवर आरोग्य यंत्रणेची तयारी होती. प्रत्यक्षात लसीकरण पाच केंद्रांवरच सुरू करण्यात आले. दरम्यान गुरुवारच्या व्हिसीत आरोग्य सचिवांकडून लसीकरणाचा आढावा घेण्यात आला. यात लसीकरण प्रक्रिया पूर्ण करण्यास १४ फेब्रुवारी ‘डेडलाईन’ देण्यात आली. त्यामुळे आरोग्य यंत्रणेद्वारा जास्तीचे केंद्र सुरू करण्याच्या हालचाली सुरू झाल्या व आता येथील नर्सिंग कॉलेज, पीडीएमएमसी, डेंटल कॉलेज, आयुर्वेदिक कॉलेज व तखतमल तसेच तिवसा, चांदूर रेल्वे व वरूड ग्रामीण रुग्णालये, मोर्शी व दर्यापूर उपजिल्हा रुग्णालयांत आता लसीकरण करण्यात येत असल्याचे समन्वयक करंजीकर यांनी सांगितले.
यापैकी नर्सिंग कॉलेजच्या केंद्रावरच फक्त कोव्हॅक्सिनची लस दिली जात आहे. उर्वरित १० केंद्रांवर कोविशिल्डची लस देण्यात येत आहे.
बॉक्स
आतापर्यंत ३,२४५ जणांना लसीकरण
जिल्ह्यात १६ जानेवारीपासून लसीकरण सुरू आहे. यात ३,२४५ जणांचे लसीकरण करण्यात आलेले आहेत. १६ जानेवारीला ४४०, १९ ला २५८, २० ला ५५८, २२ ला ५५७, २३ ला ५७५, २५ ला ८५७ जणांचे लसीकरण करण्यात आलेले आहे. यामध्ये कोविशिल्डचे ३११ व्हायलचा वापर झाल्याचे सांगण्यात आले.