सुरक्षिततेकडे दुर्लक्ष; कर्मचारी स्वतः घेतात काळजी
अमरावती : अनलॉकच्या प्रक्रियेनंतर टप्प्याटप्प्याने प्रवासी वाहतूक सुरू झाल्याने ड्युटीवर असलेल्या वाहकांचा रोजच प्रवाशांची संपर्क येतो. दररोजच्या प्रवासात अनेक गावे आणि प्रवाशांच्या संपर्कात आल्यामुळे त्यांना सर्वाधिक धोका पत्करून सेवा बजावावी लागते. आता पुन्हा कोरोनाचा प्रादुर्भाव वाढल्यामुळे चालक-वाहकांचा धोकादेखील वाढला आहे.
जिल्ह्यामध्ये लॉकडाऊननंतरच्या काळात दरदिवशी एक लाखांवर प्रवासी घेऊन जाणारी एसटी बस नव्याने संचारबंदी लागू झाल्यानंतर ८५ हजारांवर प्रवासी घेऊन ने-आण करीत आहेत. या प्रवाशांच्या संपर्कात येणारे वाहक आणि चालक कोरोना कालावधीत सर्वाधिक संक्रमित होऊ शकतात. यामुळे कोविड-१९ सारख्या आजारापासून या कर्मचाऱ्यांना सुरक्षित करण्यासाठी लसीकरण करणे आवश्यक आहे. असे केले, तरच वाहक आणि चालक सुरक्षित राहतील. त्याच्याकडून इतरांनाही धोका होणार नाही किंवा इतरांकडून त्यानाही कोरोनाची लागण होणार नाही. गावखेड्यातून शहरात प्रवासी घेऊन येणाऱ्या कर्मचाऱ्यांचे जीवनमान सुरक्षित होईल, याकरिता आरोग्य विभागाने एसटी कर्मचाऱ्यांचे महत्त्व लक्षात घेता, प्राधान्याने आरोग्य, महसूल व पोलीस कर्मचाऱ्यांप्रमाणेच लस उपलब्ध करून देण्याची मागणी विविध संघटनांकडून होत आहे.
विशेष म्हणजे, एसटी वाहक-चालकांना लस देण्याबाबत अद्यापही कुठल्याही हालचाली होताना दिसत नाही. मात्र, कोरोना लसीकरणाबाबत एसटी महामहामंडळाकडून जिल्हा प्रशासनाकडे लेखी पत्रव्यवहार केला जात आहे. अमरावती विभागात एसटी महामंडळाचे ८०१ चालक, ८६९ वाहक कार्यरत आहेत. ‘एसटीचा प्रवास - सुरक्षित प्रवास’ हे बीद्र वाहणाऱ्या एसटी बसचे चालक-वाहक मात्र कोरोना विषाणूच्या वाढत्या संसर्गाच्या काळातही आपल्या जिवाची पर्वा न करता प्रवाशांशी वाहतुकीच्या माध्यमातून संपर्कात आहेत. मात्र, कोरोना लसीपासून ते वंचित असल्याबाबत नाराजी व्यक्त होत आहे.
बॉक्स
वाहक ८६९
चालक ८०१
रोजच्या फेऱ्या १८००
बॉक्स
लसीकरण होणार कधी?
दररोज प्रवाशांच्या संपर्कात येणारे आणि फ्रंटलाईनवर काम करणाऱ्या एसटी चालक-वाहकांच्या लसीकरणासाठी विभाग नियंत्रक कार्यालयाकडून जिल्हा प्रशासनाकडे पत्रव्यवहार केला जात आहे. मात्र, लसीकरणाबाबत एसटी कर्मचाऱ्यांचा अजून विचार झालेला नाही. त्यामुळे त्यांना लसीचे संरक्षण अद्याप मिळालेले नाही.
बॉक्स
मास्क, सॅनिटायझरवर होणारा खर्च
कर्मचाऱ्यांच्या सुरक्षेसाठी मास्क, हॅन्ड सॅनिटायझर स्थानिक पातळीवर घेण्याच्या सूचना मिळाले आहेत. एसटीमध्ये निर्जंतुकीकरण करून तिला सुरक्षित करण्यात येते. यामुळे प्रवासीही सुरक्षित राहण्यास मदत होऊन प्रवाशांचा संसर्गापासून बचाव होऊ शकतो. जिल्ह्यात कर्मचाऱ्यांना सुरक्षित करण्यासाठी हँड सॅनिटायझर स्थानिक पातळीवरून पुरविण्यात आले आहे.
बॉक्स
८५ हजार प्रवाशांचा रोज प्रवास
राज्य परिवहन महामंडळाच्या एसटी बसमधून गत काही दिवसांपासून ८५ हजारांवर प्रवासी प्रवास करतात. वाहक आणि चालक दररोज त्यांच्या संपर्कात असतात. त्यामुळे या कर्मचाऱ्यांवर कोरोनाचे सावट गडद झाले आहे. त्यांना सुरक्षित करण्यासाठी लसीकरणाची गरज आहे.
बॉक्स
तपासणीच नगण्य
कोरोनायोद्धा म्हणून डॉक्टर, पोलीस, महसूल कर्मचारी आशा यांना प्रथम तपासणी करून लसीकरण करण्यात आले. मात्र, सर्वाधिक जनसंपर्क असलेल्या एसटीच्या कर्मचाऱ्यांना तपासणी केली नाही. त्यांना लसीकरणासाठी लसही अद्याप उपलब्ध झाली नाही.
कोट
विभागीय कार्यालयाकडून आठ आगारांतील एसटी कर्मचाऱ्यांचा अहवाल मागविण्यात आला आहे. त्यांना औषध उपचार करण्यासाठी उपाययोजना करण्यासह लसीकरणासंदर्भात महामंडळाकडून जिल्हा प्रशासनाकडे पत्र व्यवहार केला आहे. यामुळे यावर व्यवस्था होण्याची शक्यता आहे.
श्रीकांत गभने, विभाग नियंत्रक
कोट
दररोज हजारो प्रवाशांच्या संपर्कात एसटीचे चालक-वाहक दररोज येतात. त्यामुळे या कर्मचाऱ्यांनाही शासनाने कोरोना लसीकरणासाठी प्राधान्य देऊन लस द्यावी व कर्मचाऱ्यांच्या सुरक्षिततेसाठी सहकार्य करावे.
- बाळासाहेब राणे, विभागीय सचिव, कामगार सेना
एसटी कर्मचाऱ्यांना जीव धोक्यात टाकून दरोज लाखो प्रवाशांची वाहतूक करावी लागते. त्यामुळे संपर्कही अधिक राहतो. ही बाब लक्षात घेता, एसटी चालक-वाहकांच्या सुरक्षिततेसाठी तातडीने कोरोना लस देण्यात यावी.
- ज्ञानेश्वर खोंड, चालक