कापड व्यवसाय अडचणीत!

पावसाच्या दडीचा परिणाम, सेलमध्येही दिसेना गर्दी.

अकोला : संपूर्ण निसर्गचक्रच बिघडले असून, सुरुवातीला मुसळधार कोसळलेल्या पावसाचा गत एक महिन्यात थेंबही पडला नाही. त्यामुळे शेतकरी तर चिंतेत आहेच, सोबतच व्यावसायिकही अडचणीत आले आहेत. शेतकरी अडचणीत असल्यामुळे कापड व्यवसायही मंदीत सापडला आहे. सध्या सर्वत्र मॉन्सून सेल लागले आहेत, मात्र मॉन्सूनच नसल्यामुळे सेललाही प्रतिसाद मिळत नाही. पावसाळ्यात कापड दुकानांमध्ये प्रचंड गर्दी असते. नवरात्र उत्सव व दसरा, दिवाळीपूर्वी सध्या शहरात अनेक कापड दुकानांमध्ये सेल लागलेले असतात. ग्राहकही मोठय़ा उत्सुकतेने या मॉन्सून सेलची वाट पाहतात. या सेलमधून कोट्यवधी रुपयांची उलाढाल होते. यावर्षीसुद्धा दरवर्षीप्रमाणेच शहरातील दुकानांमध्ये सेल लागलेले आहेत. मात्र, दरवर्षीप्रमाणे यावर्षी दुकानांमध्ये गर्दी नाही. सेलला उत्तम प्रतिसाद मिळत नसून, ग्राहकच येत नसल्याचे काही दुकानदारांनी सांगितले. छोट्या व्यावसायिकांना २0 ते २५ टक्के नुकसानाचा सामना करावा लागत असून, मोठय़ा व्यावसायिकांना तर ४0 ते ५0 टक्क्यांपर्यंंंत नुकसानाचा फटका बसत आहे. यावर्षी जर पिकांचे नुकसान झाले तर पुढील वर्षी तर या व्यवसायात प्रचंड तोटा सहन करावा लागणार असल्याचे काही व्यावसायिकांनी सांगितले. शेती व्यवसायामुळे केवळ शेतकरीच नाही, तर संपूर्ण बाजारपेठेत पैशांची देवाण-घेवाण होते. त्यामुळे ग्राहकही वाढतात व मालाची विक्री होते. यावर्षी मात्र व्यावसायिकांवर गंभीर परिस्थिती आहे. शासकीय कर्मचार्‍यांव्यतिरिक्त अन्य ग्राहक दुकानांमध्ये फिरकतही नसल्याचे व्यावसायिकांनी सांगितले.